Машҳур телеканалларда янграйдиган машҳур ёлғонлар:

“Севимли каналингизда!”

“Кўплаб телетомошабинларнинг талаб ва истагига кўра!”

“Энг дилбар хонанда!”

* * *

Ҳамма яхши яшашни хоҳлайди, бироқ буни қўшиқчилар кўпроқ уддалайди.

* * *

Ажабо, баъзилар Худодан эмас, видеокузатувдан кўпроқ қўрқишади!

* * *

Ҳаётда ҳамма нарса бўлиши мумкин, бироқ “Маданият ва маърифат” канали Позилжонов фильмларини қўймаслиги аниқ!

* * *

Ҳурматли хонандалар! Хорижга чиқишдан аввал тушунтириш хати ёзишни машқ қилинг!

* * *

Воажаб, тасодиф шунчалик бўлар: энг оригинал клип олсанг ҳам чет элникига бўлиб чиқади-я!

* * *

Бугун кулдирадиган (қизиқчи)лар кўпайган сари куладиганларнинг сони камайиб бормоқда!

* * *

Баъзи сериалларни кўриб, “матриархат” сўзини беихтиёр тилга оласан!

* * *

Ҳар қандай янги қўшиқ — унутилган эски хонишдир!

* * *

Ўзбек киносининг дурдона фильмларини кўрмоқчимисан? Унда байрамларни кут!

* * *

 “Ухлавотти Марио, дам овотти Марио”... Бир пайтлардаги ушбу қўшиқ ижрочиси Эргашевнинг ўзи ухлаяпти, шекилли, ижодида жимжитлик!

* * *

Тирикчиликнинг айби йўқ! Аммо порахўрликнинг эмас!!!

* * *

Қалпоқ деганда бош кийим ёки кўрсатувдан кўра катта қорин кўз олдингга келадиган бўлган!

* * *

Агар “Декамерон” муаллифи Жованни Бокаччо гўридан тирилиб келганида борми, “телеграм”даги лавҳаларни кўриб, гўрига қайта кириб кетган бўларди!

* * *

Гап тақир каллада эмас, балки шу калладан чиқадиган тутуриқсиз гапда!

Муаллиф: Анвар Намозов