Тўйга таклиф қилинганда...

Эркак: — Қанча тўёна берсам экан?

Аёл: — Қандай кўйлак кийсам экан?

Фарзанд: — Қайси артист келар экан?

* * *

Ёмон одам йўқ, ёмон таассурот бор, холос.

* * *

Хонандага ёқмайдиган саволлари бешлиги:

1. Нега фонограммада куйлайсиз?

2. Нечта уйингиз ва машинангиз бор?

3. Нима учун фало-о-о-н қўшиғингиз ўғирланган?

4. Тўйдан қанча пул ишлайсиз?

5. Неча марта эрга теккансиз?

* * *

Шунчалик мияга сингиб кетдики, гўёки бутун дунё отлари Ҳосилага патентлаштириб берилгандек!

* * *

Аксиома: телеканаллар кўпайгани сайин ҳақиқий юлдузлар шу қадар камайиб бораверади.

* * *

“Омадли” актёр ёки актриса аввал театр саҳнасига чиқади, сўнг кино экранига, кейин эса шоу-бизнесга ўтиб кетади.

* * *

Хайрият, артистлар бор! Акс ҳолда тўйлар мажлисбозликка айланиб кетарди.

* * *

Оёқнинг томири тортишса, “Вай-вай-вай...” деб бақириш, кейин эса уни қўшиққа айлантириш мумкин.

* * *

Сериалдаги кўзлари юмуқ Эсмеральдадан ҳаётдаги кўзлари очиқ Эсмеральда банкалари шармандали чиқди.

* * *

Эркаклар саволи экранга кўчган ягона кўрсатув: “Бугун нима овқат?”

* * *

Ҳолливуддан артист чақирасанми, бир ярим миллиард сўм пул сарфлайсанми, барон тугул граф ҳақида кино оласанми, пиратларга вааааабщщще фарқи йўқ!

* * *

Бугун биттаси ўзининг концертида никоҳ тўйини ўтказмоқчи! Эртага бошқаси саҳнага чиқиб туғаман демасин ишқилиб!

* * *

Дунёдаги энг қизиқарли ва ўчмас мавзу: ўзганинг чўнтаги!

* * *

У шу қадар самимий санъаткорки, “Пари-пари” қўшиғини худди ўзиникидек куйлайди!

* * *

Биз, ўзбекларнинг энг яхши сифатимиз — меҳнатсеварлигимиз, энг ёмон сифатимиз эса — меҳнатсеварларни ғийбат қилишимиздир!

Муаллиф: Анвар Намозов