ЖАҲОНГИР ОТАЖОНОВНИНГ "СОҒИНДИМ” ДЕБ НОМЛАНГАН КОНЦЕРТ ДАСТУРИНИНГ ИККИНЧИ КУНИДАН РЕПОРТАЖ

Соат 18.30 ларда Истиқлол санъат саройига кириб келганимизда, саҳна ортида концертга тайёргарлик жараёни кетаётган эди. Хонанда Жаҳонгир Отажонов эса, концерт олдидан репетиция жараёнини ҳозиргина ниҳоясига етказган экан.    Жаҳонгир Отажонов, шу вақтда  биз билан ва концертга меҳмон сифатида келган хонанда Даврон Эргашев билан самимий саломлашди.

            Концертга тайёргарликнинг сўнгги жараёнлари кетаётган эди.

Концерт ўтказилаётган катта залга чиқдик. Томошабинлар гавжум, барчалари ўз ўринларини эгаллаш билан банд.

Бугун концертнинг иккинчи куни, биринчи кундагидан сезиларли даражада фарқ қилди. Қўшиқлар дастурида ўзгаришлар киритилиб, масалан, концертда чиқиш қилаётган ёш хонандаларнинг саҳнага чиқиш вақтлари ўзгарган. Бундан ташқари, хонанда Жаҳонгир Отажонов қўшиқ куйлаётган вақти, бир неча марта саҳнадан залга, томошабинлар ёнига тушиб, улар билан кўришди. Томошабинлар, мухлислар хонандага бир неча бор зар тўн кийдирдилар, гуллар тақдим қилдилар, онахонлар дуо қилдилар. Ҳатто, мухлислар хонандага пешонасидаги терни артиш учун, самимий тарзда янги дастрўмол ҳам тақдим қилдилар. Ҳамма янада кўтаринки кайфиятда, хонандани олқишлардилар.

Томошабинлар хонанда томонидан куйланган ҳар бир қўшиққа алоҳида ёндошиб, деярли бошидан охиригача, қўшиқ сўзларини хонанда билан баравар такрорлаб, куйлаб, қарсак чалардилар.

Хонанда қўшиқларни куйлаётиб, айниқса, авжига чиққан маҳалда, залдаги томошабинлар завқланиб, баланд овозда қарсак чалиб олқишлардилар. Айниқса, "Аёл макридан”, "Айтишим шартмиди ошиқлигимни”, "Ёр-ёр айтманг”, "Оллоҳим”, "Севгилим” қўшиқларининг авжида, олқишлар ва қарсаклар тинмади!

"Ҳаёт бунча қийнайсан” қўшиғининг ижро вақтида, хонанда Жаҳонгир Отажоновга жиянларидан бири Мардон Отажонов реп айтиб, орада биргаликда куйлади.

"Синфдош қиз” қўшиғидан сўнг, концерт дастурида кутилмаган ўзгариш содир бўлди. Хонандага томошабинлардан бири кичик қоғозчага "Оқ булутлар” қўшиғини куйлаб беришини сўраб ёзиб, чиқартириб юборибди.  Хонанда Жаҳонгир Отажонов бу илтимосдан ҳам ҳайрон ва ҳам хурсанд бўлиб, қўшиқни куйлаб бермоқчилигини билдирди. Фақат, бу қўшиқни куйлаш учун, созандалар билан бирга машқ қилиб тайёргарлик кўрмаганлигини, шунга камчиликлари бўлса, узр дея қўшиқ куйлашни бошлади. Хонанда "Оқ булутлар аро икки кабутар” дея, қўшиқ куйлашни бошлаши билан залда кучли қарсак, олқишлар ҳамда, хонанда билан биргаликда, қўшиқни куйлаш бошланди!

Томошабинлар бу қўшиқни ёддан билишларини намойиш этиб, хонанда билан биргаликда берилиб куйлардилар. Хонанда бу қўшиқни ҳеч бир тайёргарликсиз, жонли ижрода куйлаб, ҳаммани яна бир бор қойил қолдирди. Томошабинлар бу қўшиқни шунчалик соғинишган экан-ки, ҳеч тугашини ҳоҳламай, қайта-қайта қўшиқ сўзларини такрорлашарди.

Ҳатто,  Жаҳонгир   бир муддат ўзи айтмай туриб, микрофонни зал томонга тутди. Томошабинлар қўшиқ сўзларини такрорлаб куйлаб бердилар. Хонанда томошабинлар куйлашаётганда, мусиқани ҳам тўхтатиб турди. Бутун томошабинлар зали    бир овозда куйлаши шу қадар ажойиб янградики буни таърифлаб бериш жуда қийин.

Қўшиқ куйлаётган маҳалда, томошабинлардан бири хонандага оқ атиргуллар тақдим қилди ва хонанда "оқ атиргуллар дегандим, оқ атиргуллар ҳам чиқди” деб самимий ҳазил қилиб, миннатдорчилик билдирди. Бошқа қўшиқлар айтилаётган вақтда ҳам, томошабинлар томонидан тақдим қилинаётган гуллар тўхтамади.

Концерт жуда ҳам самимий ва кўтаринки руҳда ўтди.

Концерт тугагач, меҳмонлар ва томошабинларнинг концерт ҳақидаги фикрлари билан қизиқдик.

Хонанда Бахтиёр Султонов: -Мен ҳам 1999 йилда жонли концерт берганман. Ҳозир ўзимни кўргандек бўлдим, назаримда. Жаҳонгир Отажоновнинг бу жонли ижродаги концерти, аъло даражада ўтди! Унинг ижодини доимо кузатиб келаман. Хонанда устоз-шогирд анъаналарига эътибор берадиган йигит. Дастур репертуари жуда ҳам яхши чиққан. Қўлида қоғоз билан жонли куйлаш, бу жуда ҳам оғир. Эстрада замонавий қўшиқ шоуси, ана шундай жонли бўлиши керак, назаримда. Ҳеч қандай ясамаликларсиз!

Хонанда Равшан Намозов: - Икки кундан бери, концертни чиройли ва сифатли даражада ўтиши учун, аппаратларни, съёмкаларини ўзимиз назорат қилиб, биргаликда ишладик. Бу биринчи биргаликдаги ишимиз. Биз "озвучка, "настройка”ларни қилдик. Жаҳонгирнинг ўзи жуда ҳам ижодкор, меҳнаткаш йигит. Мен ўзим халқни ана шундай, жонли ижрога яқинлаштириб ва ўргатишни жуда ҳам истардим. Иложи борича, халқ фонограмма билан жонли ижронинг фарқига бориб, ўшани қадрлашни ўрганишса! Фонограммани уйда ҳам қўйиб эшитса бўлади. Лекин, концерт, бу саҳна – жонли ижро учун, меҳнат учун қилинган саҳна! Биз шунинг тарафдоримиз! Шунинг учун, ҳаммамиз йиғилиб, биргаликда ҳаракат қилдик.

Иқбол Муҳамедова ўқитувчи: – Концерт менга жуда ҳам ёқди. Кўпдан ана шундай жонли ижродаги қўшиқларни тинглагим келганди. Концертни аввалига, 3–4 қўшиқ жонли бўлиб, қолганига бошқаларга ўхшаб, фонограмма қилиб юборишса керак деб ўйлагандим. Буни қаранг, ҳатто Жаҳонгир Отажоновнинг синглиси ва жияни Алишергача жонли ижрода куйлашди! Жаҳонгир Отажоновнинг ўзи бошидан охиригача жонли ижрода куйлаб, яна илтимос қилинган "Оқ булутлар” қўшиғини ҳам тайёргарлик қилмай, айтиб берди. Қойил қолдим! Менга айниқса, сокин қўшиқлари ёқди! Қўшиқларини маъноси ҳам кучли, сараланган. Баъзи қўшиқларини эшитиб, кўзларимга ёш келди. Лекин, шўх қўшиқлари ҳам чакки эмас. Рақслар чиройли саҳналаштирилган. "Кўзим қувонарму” билан "Тановар” менга жуда ҳам ёқди. "Севгилим” қўшиғини рақси ҳам, бошқача чиқибди.

Абдулла Жамолиддинов тадбиркор: – Концертга оилам, рафиқам ва икки ўғлим билан билан келдик. Ўзи оиламиз билан концертга тушишни яхши кўрамиз. Кўп концертларга тушганмиз, лекин бунақаси бўлмаган эди! Жаҳонгир Отажоновнинг ҳар бир қўшиғига алоҳида қарсаклар, томошабинлар ҳамма қўшиқларини ёддан айтишяпти! Концерт охиригача, хонанда жонли куйлади, овози бир маромда чиқди, ҳайрон қолдим, худди фонограммадек бир текис, кучли овоз! Бўлар экан–ку, шундай ижод қилинса! Ҳаммага ўрнак бўлса арзийди! Ҳеч қандай бир костюмларсиз, шоуларсиз, дабдабаларсиз, самимий, халқона концерт! Менга айниқса, "Оллоҳим”, "Айтишим шартмиди”, "Ҳаёт бунча қийнайсан” қўшиқлари ёқди. Хонандага бу концертда эришилган ютуқлар билан тўхтаб қолмасликни, янада ижод қилишни тилайман! Токи, мана шундай жонли концертлар кўпаяверсин.

Марҳабо Ёқубова талаба:–Концертга дугоналарим билан бирга тушдик. Бизга хонанда Жаҳонгир Отажоновнинг қўшиқлари ёқади. Концерт бошидан охиригача жонли ижрода бўлди. Созандалар ҳам мусиқаларни яхши чалишди. Концерт ёқди, соғинган қўшиқларимизни эшитдик. "Оқ булутлар”ни куйлаганлари жуда зўр чиқди!

Концерт номи бежиз "Соғиндим” деб номланмаган, назаримизда. Томошабинлар ва мухлислар ҳам, хонандани, унинг санъатини соғинганликларини, концерт давомида намойиш этдилар, десак янглишмаймиз.

Чиндан ҳам, хонанда Жаҳонгир Отажоновнинг икки кунлик концерт дастури энг файзли, самимий ва жонли концерт бўлди, деб ўйлаймиз. Ҳақиқий санъатга ортиқча ҳашам шарт эмас, назаримизда!

Феруза Фаттохова

Саида Вахобова

 Концертни энг сара лавхаларидан ВИДЕО: