4-қисм:

                                                 "Нафс таъми қай тилда?"

Қўйнинг айрим қисмлари солинган "сомсааааааааааа”лар бор....

  Ассалому алайкум! Бугунги пирогимни тайёрлаш учун бир нечта жойларга «экскурсия» қилдим. Аввал "Чорсу”га бордим, кейин текин сарёғ билан асал едим, "Чиғатой” маҳалласига бир кириб ўтиб, сўнгра "Саримсоқ пирог”нинг "даҳшат” турини тайёрладим!

Саёҳатимни дугонам маслаҳат берган жойдан бошладим, "Чорсу”даги овқат бозор!

Бордик! Вой-дод, кўзларим турли хил таомлардан, бурним эса шашликнинг тутунидан, қулоқларим қўйнинг айрим қисмлари солинган "сомсааааааааааа” рекламасидан, шашлик, норин деган товушлардан "қақшаб” кетди. "Антигигиена очил дастурхон” марказида лаззатли таомлар жам бўлиб олишган, қорни очган мижозларга кўз тикиб ўтиришибди. Мен 1 дона қийма шашлик билан ярим порция норин олдим...

Комедия эса сотувчи хоним бизга ўтириш учун таклиф қилган жойдан бошланди. Юзлаб, минглаб, балки миллионлаб одамларга хизмат қилган кўрпачани ичида пахтаси ҳам қолмаган, эскиии, кииир бўлиб кетган қадимий  курпачага ўтирдиму, атрофга назар ташладим ва бунга афсус қилдим... Хаш-паш дегунча нориннинг шўрваси ҳам келди... Шўрва солинган коса бир пайтлар коса бўлган, ҳозир эса учлари синавериб, синавериб пиёлага айланган, ўтган асрда чиқарилган "антиквар” алюмин қошиқни кўриб, " ё тавба” деб, аввал уни томоша қилдим. Менимча бундай қошиклар фақатгина музейларда бўлади... Қошиқни ювган инсонга "тасаннолар” айтиб, дугонамга энсамни қотириб, шўрвадан бир қошиқ ичиб кўрдим...

МАЗАЛИ!!! Шўрвани ҳам ичдик, қийма шашликни ҳам едик, хеч кимга қарамасдан, кир-чир жой, учлари учиб кетган коса, қийшиқ қошик, пиёзнинг хиди, хуллас гигиенани бир жойга суриб қўйиб, мазза қилиб тушлик қилдик. Тўланадиган хисобни эса ошхона каби камтарлиги шахсан менга, ўртоғимга ҳам ёқди. Фақат бу ернинг таровати худди саримсоқнинг хидига ўхшаб анчагача мени ўраб юрди...

Саёҳатимни 2 манзили жуда оммалашган турк таомларини тайёрлашага мослашган кафе, йўқ ресторан, хуллас тамаддихона бўлди.

Янги очилган экан, ҳамма жой ярақлаб турибди. Шундоқ ўтирганимни биламан, олдимга фигурний "истакон” тарақ этиб қўйилди, ичида аччиқ чой, индамадим, кейин нон келди, иссиққина... индамадим, асал, қаймоқ ва сарёғдан кейин, қўрқиб кетдим! Нега, чунки тушлик учун мўлжалланган пулимни "Чорсу” бозорга ташлаб келганман-да! Хуллас, шундоқ ҳам кичкина бўлмаган кўзларимни катта-катта очиб, майин овозда фақатгина қаҳва ичмоқчи эканлигимни тушунтирдим. 

Официант эса, табассум ила "Бу масканимиздан, сизга совға!” деди. Ана бўлмасам, хуллас, хурсанд бўлиб чиққан бу жойни ҳамма танишларимга реклама қилдим! Текин деса ломни ёнмачасига ютадиган инсонлар учун зап жой экан дея саёҳатимни тугатдим.

Аммо... Аммо 1 ойдан сўнг шу жойга халиги "Чорсу”га бирга борган дугонам борку, ўшани олиб бордим.  Мақталган келин.... бир нима қилиши ҳақидаги мақолни шу жойга қўшиб қўйсак мос тушади. Фикрим буткул қарама- қарши томонга ўзгарди. Нақд 10 минут олдимизга официант тугул, фаррош ҳам келмади. 

Охири аста-аста қадам ташлаб бир официант йигит келиб, буюртмани олди. Реклама қилган жойиз шуми, диди дугонам... Орадан 25 дақиқа ўтгач, "шохона таом” келди, бекорларни бештасини айтдим, ҳеч қанақа "шохона-похона” эмас, оддий шашлик, фақат сихни ўрнида чўпчалар тиқилган ва пишмаганрок... Ликопчада алланима сариқ нарса турибди, кейин яхшилаб қарасам, бу жанивар 4 кун олдин тёркадан ўтказилган ва қуриб қолган, қачонлардир сабзи бўлган масса экан... Майли татиб кўрдик... Пули куйган одам, қалампир чайнайди дедимда, егим кемаса ҳам зўр базўр тугатдик. Кейин эса официантни чақириб, ичимдаги меҳрли сўзларимни бошидан қуйдим. У эса менга чекни узатди. Кўриб, дугонамга қарадимда, "нимларани еб қўйдик дугонажон...” -  дедим. Тагига 15 фоизлик хизмат ҳаққи билан халиги бола мўлтиллаб турибди, одамни раҳмини келтириб... Асал емий, заҳар егандай бўлдим деди ўртоғим... Шу тариқа энди ўша масканни кўрсам, айланиб ўтадиган бўлдим.

Сиз-чи, сиз қаерда овқатланасиз? Қани, айтингчи, сизни қайси мамлакат ошхонаси ўзига магнитдек тортади? Вилоятларга ташриф буюрганимда негадир, турк таомлари тайёрланадиган жойларни хечам кўрмайман, менимча турк таомларининг ашаддий шинавандалари Тошкент шаҳрида "базировать” қилса керак.

Туркиянинг ҳамма шаҳарларини номи бор Тошкенту азимнинг кўчаларида, шаҳримизни бағри кенг ҳаммани сиғдира олади!!! Гап бунда эмас, гап шундаки бу тамаддихоналар шунчалик кўпайиб кетганки, хаттоки келинлар ҳам, яқинда уйда овқат қилиш кераклигини унутиб қўйишади.

Тасаввур қилинг, пайшанба куни, ҳонадонларда ош, палов эмас, "Искендер” деган овқат тайёрланса... А, нима, тўғрида, ана шу жойларда "ёпишиб” овқатланадиган қизларимиз, келин бўлиб хонадонингизга тушса, сизга мошҳўрда қилиб бера оладими, мен иккиланаман бунга, улар "чечевица” шўрва қилишади, мошхўрдани ўрнига....

Бу бозор, рақобат бор жойда ривожланиш бўлади. Тушунаман, лекин бунчалик эмасда...

Бир қарасангиз ҳамма жойни табакалар, дўмбоқ жўжалар, "цИплята”табакалар босган эди, энди эса...

Шу жойда бир танишимнинг ҳикоясини бир сўзлаб берсам. Танишимнинг Франциялик бир таниши Тошкентга келади, Тошкентни айланишади мазза қилиб. Овқатланиш фурсати етади. Шунда халиги меҳмон, кўзларини бечара қилиб, "Чиғатой” га борайлик дейди. Шу жойда мезбон қотади, у шокда! Билсаки, кулинария ватанидан келган, курбақаларни чирқиратиб қовуриб ейдиган нозик дид бир француз Тошкентнинг "Чиғатой” маҳалласидан борган шашликдан қачонлардир татиб кўрган экан...

Мазали таомларимизнинг номи дунёга машхур. Биз эса бошқа юрт таомларига ошиқмиз...

Шахсан мен ўзимнинг танловимни қилиб бўлдим, ўзимнинг ошхонамга етадигани йўқ!!!

Гап тамом вассалом!

"Саримсоқ пирог”нинг хидини қаранг...

Бай бай бай бай!!!

Дилларни яшнатиб, кўзларни ёшлатмоқда!

Баҳор келганда авиатминоздан қутулиш учун фойдали бўлган маҳсулотлар, масалан саримсоқдан кўпроқ тановвул қилинг. Зора, у сизни ғалати-ғалати вируслардан ҳимоя қилса...

Айтгандай, сиз истаган масканингизда, истаган таомларингизни тановвул қилишингиз мумкин. Сизга ҳеч ким қаршилик қилмайди. Юқорида ёзганларим эса, шахсий тажриба ва шахсий фикр эди.

Сиз билан камина, Интизор Очилова бўлди.

Шу ўринда ўз фикримни қўшмасам бўлмади)))

Тўппа тўғри бошида уларнинг рекламаси кучли ва мулойим, текин нарсалари билан сийлаб бора бора йўқ бўлади. Вахоланки текинга алданадиган халқ бўлсак хам майли эди.

Яқиндагина шундай бир турк тамаддихонасига кириб пицца сўрадиму....суюқ пицца бўлишини илк маротаба ўзимга кашф қилдим. Оддий қора аччиқ чойни бардак деб фигуркалаб бериш.. Рекламада главное подача дегандек.

Интизорнинг  мақоласини сайтга қўйишга тайёрлаш чоғида бир танишим билан онлайн сухбатда эдим. Бу хоразмлик танишим айни дамда уйида шашлик қилаётганини айтди. ММС орқали Хоразмдан келган қайноққина шашликлар билан сизлар билан бўлишамиз.

Свежыйига нима етсин?)) Ох ох қаранг кўмир ифори ила пишаётган шалиииик))) Шу онда шартта хамма нарсани ташлаб бориб танишим билан шашлик еб келдик.)))

Sayyod