2015 йил 15 январь куни “Пойтахт” бизнес марказида Миллий эстрада санъатини ривожлантириш ва мувофиқлаштириш Кенгаши ҳамда “Ўзбекнаво” эстрада бирлашмасининг 2014 йилги фаолияти якунига бағишланган ҳисобот йиғилиши бўлиб ўтди.  Йиллик анжуманнинг бошида 2014 йилда бажарилган ишлар ҳисоботи, 2015 йил учун қилинадиган ишлар режаси ҳақида ҳисобот ва янги режалар айтилган бўлса,  давомида ўтган йили  давлат тадбирларида, пахта йиғимида фаол иштирок этган ижодкорлар, шунингдек, “Кексаларни эъзозлаш йили” муносабати билан ёши улуғ санъаткорлар, хаттоки санъатимиз ривожида ўз ҳиссаларини аямай қўшиб келаётган раққоса устозлар ва шоир – бастакорлар ҳам Маданият ва спорт ишлари вазирлиги томонидан турли хил номинациялар бўйича диплом билан тақдирландилар:

 Хоразм рақс санъатини ривожлантириб келаётган, Мустақиллик ва Наврўз байрамларида хоразмча рақсларни ташкил этиб келаётган “Гавҳар” ансамбли раҳбари  Гавҳар Матёқубова, Шоир Сирожиддин Саид, Ўзбекистон санъат арбоби Темур Маҳмудов, шоира Фарида Афруз, шоир Иқбол Мирзо, шоир Муҳаммад Тоир, бастакорлар уюшмаси аъзолари – Зокиров Шухрат, Умаров Нодирбек Тўлқинович, раққоса Гавҳар Матёқубованинг  шогирди, “Ниҳол” мукофоти совриндори Дилноза Ортиқова, продюссерлар – Рахматуллаев Сарвар Анварович (Тарона) ва Дадабоев Илёс (Озодбек продюсери) , булардан ташқари Самандар Ҳамроқулов, Шохруххон, Собиржон Мўминов, Азим Муллахонов, Козим Қаюмов, “Сурхон” гуруҳи, Манзура, Божалар гурухи, Лола Йўлдошева,  Райхона Ғаниева, Алишер Файз, Абдурашид Йўлдошев, Гулсанам Мамазоитова, Улуғбек Рахматуллаев, Ғуломжон Ёқубов, Зулайхо Бойхонова, Озодбек Назарбеков ва бошқалар тақдирланишди.

 Тадбирда тақдирланганлардан ташқари Шухрат Қаюмов, Махмуд Намозов, Ёдгор Мирзажоновлар иштирок этишди, аммо тақдирланганлардан Ғуломжон Ёқубов, Зулайхо Бойхонова, Райхона Ғаниева, Озодбек Назарбеков ва Улуғбек Рахматуллаевлар айрим сабабларга кўра қатнаша олишмади.

 Ушбу тақдирланган ижод аҳлига 6 ойлик бепул лицензия ва эстрада санъатини ривожлантириш бошқармаси томонидан бир миллион сўмдан мукофот пули берилди.

 Тадбирда “Ўзбекнаво” даги ўзгаришлар ҳақида ҳам гап борди, унда Абдуқаҳҳоров Одилжон лицензия бўлими бошлиғи, Мажидов Мурод  “Ўзбекнаво” раҳбари ўринбосари лавозимига тайинланишгани эълон қилинди.

 2015  йил ҳам белгиланган вазифалар изчил бажарилиб, миллий эстрада санъатини янада ривожлантириш, ёш ижрочиларни “оммавий маданият” таъсиридан ҳимоя қилиш мақсадида “шоир – бастакор – ижрочи” ижодий учлиги ҳамкорлигини янада мустаҳкамлаш, иқтидорли ўғил – қизларни кашф этишга қаратилган кўрик – танловлар уюштириш, Бирлашмада ва Республиканинг ҳар бир ҳудудида режа асосида замонавий талабларга жавоб берадиган овоз ёзиш студиялари фаолиятини йўлга қўйиш, ижрочи ва ижодий жамоалар ҳақида маълумотлар, улар томонидан ижро этилган қўшиқлар, шеър матнларини ўз ичига оладиган электрон базани шакллантириш ва уни доимий тўлдириб бориш каби ишлар амалга оширилиши кўзда тутилган.

Шахло Қодирова ва Дилобар Сухбатова  тайёрлади.

Сураткор Баходир Матёқубов