27 май куни соат 15.00 да «Ўзбекнаво» эстрада санъат бирлашмасида, ҳозирги кундаги хонандаликда, реп йўналиши борасида навбатдаги йиғилиш бўлиб ўтди. Унга ҳозирги кунда реп йўналишида ижод қилаётган ёшлар таклиф қилинган бўлиб, улар орасида хонанда Руслан Салиев (Mr.Slan) ва рэпер Шохрух Шодмонов, ҳамда рэпер Сема ҳам бор эдилар. Бу галги йиғилиш аввалгисидан бироз фарқ қилди.

Йиғилишда биринчи йиғилишдан сўнг, ўтган вақт ичида бўлган ўзгаришлар ҳақида сўз юритилиб, "Ўзбекнаво” қошидаги Ижодий марказ ҳақида, ёш рэперларга ижод масаласида, фикр борасида ҳам ижодий ёрдамлар берилиши, рэп санъатини тўғри йўналтира билиш зарурлиги тўғрисида фикрлар алмашилди. Шунингдек, йиғилишда ҳозирги кундаги қизлардан ёш рэперлардан бири Нилуфар Нурсаидова (Nilu)нинг ижоди ҳақида, илиқ фикрлар билдирилди.

Йиғилишга келган рэперлар, ҳозирги кундаги баъзи интернет сайтларда, рэп санъатини тушунмайдиган баъзи ёшлар тарафидан, билиб-билмай куйланган рэп қўшиқлар қўйилаётганлигини, бу туфайли бошқаларда рэп ҳақида нотўғри тушунча пайдо бўлиши мумкинлиги, бунинг жабрини эса, рэп санъатида чинакам ижод қилмоқчи бўлаётган ёш рэперлар тортиши мумкинлигини ҳам, айтиб ўтишди. Бу мавзу рэперлар орасида баҳсга сабаб бўлди.

Йиғилишда ёш рэперлар ўзаро фикр алмашиб, мулоқотда бўлдилар ва рэп санъатини ривожлантириш борасида биринчи йиғилишдан сўнг, бугунги кунгача бўлган вақт ичида, ўзлари жавоб топишга қийналган саволларга, жавоблар олдилар.

"Ўзбекнаво” раҳбари Азамат Ҳайдаров: - Бундан олдинги биринчи йиғилишда, ёш ижодкор рэперларни кўплари билан танишгандик. Уларнинг ижодини  ҳеч ким тушунмаётгандек эди. Шунинг учун, улар ўзларича изланаётган эдилар. Ҳозир ҳам, баъзилар уларнинг ижодидан камчилик қидиради назаримда, худди эстрада билан лирикада ижод қилаётганлар, бир-бирини тушунмаётгандек. Лекин, бу ёш ижодкорларга ижодий ёрдам керак, фикримча. Ҳозирда биз, бу ёш ижодкор рэперлар билан суҳбатлашиб, уларнинг ижодини тўғри йўналтиришга ҳаракат қиляпмиз. Бошқалар ҳам келишсин, мурожаат этишсин, уларнинг ижодини юзага чиқарамиз. Уларга имкон беришимиз керак, менимча. Ҳозирча улардан лицензия сўралмайди. Чунки, улар ҳам томошабин олдига чиқишлари керак, деб ўйлайман.

Йиғилишда шунингдек, "Ўзбекнаво” мутасаддилари томонидан, ёш рэперлардан ўз ижод намуналарини тақдим этишлари мумкинлиги ҳам айтилиб, улар ичидан кучлилари саралаб олиниб, "Ўзбекнаво” томонидан ўтказилаётган "Марду майдон” жонли ижро фестивалида қатнашишлари мумкинлиги ҳам айтиб ўтилди ва улардан бир нечталари йиғилишнинг ўзидаёқ жонли ижро фестивалида қатнашиш учун, ўз ижод намуналарини тақдим этдилар.

Феруза Фаттохова