11 февраль соат 15.00 да «Ўзбекнаво» эстрада бирлашмасида, ҳозирги кундаги хонандаликда, рэп йўналиши мавзусида йиғилиш бўлиб ўтди. Унга таниқли санъаткорлар билан бир қаторда, ҳозирги кунда рэп йўналишида ижод қилаётган ёшлар ҳам ихтиёрий равишда таклиф қилинган эдилар.

Йиғилишни "Ўзбекнаво” Бош директори Азамат Ҳайдаров очиб бериб, ҳозирги кунда ижодкорлар учун ҳамма шароитлар яратиб берилганлиги ҳақида айтиб ўтиб, бугунги йиғилишдан мақсад, рэп йўналишида ижод қилувчи хонандалар билан шу йўналиш ҳақида очиқ мулоқот эканлигини маълум қилди. Ҳамда, "Ўзбекнаво” қошида "Озодбек Назарбеков Ижодий Маркази” ташкил қилинганлигини ҳам эълон қилиб, йиғилишдан сўнг, ушбу Ижодий Марказ билан ҳам танишиш мумкинлигини билдирди ва йиғилиш қатнашчиларини таништириб ўтди.  

Йиғилишда Ўзбекистон халқ шоири Иқбол Мирзо, Ўзбекистон халқ артисти Озодбек Назарбеков йиғилиш қатнашчиларининг саволларига жавоб қайтардилар.

Шунингдек, йиғилишда бастакор Игорь Иосис, "Тарона” студияси директори Даврон Муқимов, хонанда Шахриёр, радио муҳаррирлар, ёш шоирлар, журналистлар ҳамда бир неча ижодкорлар иштирок этдилар.

"Ўзбекнаво” Бош директори Азамат Ҳайдаров биринчи бўлиб, Ўзбекистон халқ шоири Иқбол Мирзога сўз берди. Иқбол Мирзо рэп йўналишини ҳам тушунишга ҳаракат қилиш мумкинлигини, "Озодбек Назарбеков Ижодий Маркази”нинг мақсади, бошқаларга ўхшамаган оригинал иқтидорли қўшиқчи ёшларни юзага чиқариш эканлигини,  ёшларга шеърият масаласида, фикр борасида ҳам ижодий ёрдамлар берилиши мумкинлигини айтиб ўтди.

Сўз навбати Ўзбекистон халқ артисти Озодбек Назарбековга берилганида, у киши ушбу ижодий марказда ёшлар фикр алмашишлари, ўз ижодий асарларини сайқаллаб, сифат даражасини кўтаришда мутахасислар билан ижодий ҳамкорлик қилишлари мумкинлигини билдирди. Сўнг, рэп ҳам алоҳида бир санъат эканлиги ва уни фақат тўғри йўналтира билиш зарурлиги, бунда ҳам ўзбек модели, яъни ўзбек санъати бўлиши кераклиги, ўзбек санъаткорлари бир бўлсалар кўплаб ютуқларга эришишлари мумкинлиги ҳақида сўзлади. Сўнг, бугунги йиғилишдагилар ўзларини қизиқтирган саволларни очиқ-ойдин бериб, уларга жавоб олишлари ва фикр билдириш мумкинлигини ҳам айтиб ўтди.

Шундан сўнг, йиғилишдагилар ўзларини қизиқтирган кўплаб саволларга жавоб олдилар.

Йиғилишда, ҳозирги кундаги рэп йўналиши билан боғлиқ бир қатор савол-жавоблар бўлиб ўтди.

Рэп йўналишига нисбатан фикрлар қандай?

Бирор-бир хонанда рэп йўналишидаги қўшиқда ноўрин сўзлардан фойдаланса, бунга нега бошқалар ҳам жавобгар бўлишлари керак?

Рэп йўналишидаги қўшиққа инглизча, тожикча, русча сўзлар қўшиш мумкинми? – каби бир қатор саволларга жавобан, йиғилиш қатнашчилари, албатта ҳар қандай ҳолатда ҳам профессионаллар билан маслаҳатлашиш зарурлиги, ташкил этилган "Озодбек Назарбеков ижодий маркази” орқали ёшларга сўз, фикр борасида ижодий ёрдам берилиши мумкинлиги, қандайдир тушунмовчиликлар ва муаммолар бўлса, уларни ечиш кераклиги, ёшларни тўғри йўлга солиш, рэп йўналишини келиб чиқиши, биргаликда ҳамкорлик қилиш, қўшиқ сифатига эътибор қаратиш, бугунги кундаги ёш ижодкорларга яратилган шароитлар, керакли имкониятлардан фойдаланиш кераклиги, рэп йўналиши бўйича хонандалардан, масалан, Шахриёр Республикамизни катта саҳнасида қатнашганлиги, рэп ижодий маҳсули бўлган қўшиқларни ҳам радиоэфирларда берилаётганлиги, рэп йўналишида Тв телеканалларида берилаётган қўшиқлар, лекин ҳозирда бу йўналишдаги қўшиқларнинг баъзиларида сифатнинг сустлиги, сифатсиз қўшиқлар эфирга қўйилмаслиги, эндиликда ижод лабораторияси борлиги,  ҳамда келиб бемалол маслаҳатлашиш мумкинлигини маълум қилишди.

 Шахриёр ҳам сўзга чиқиб, рэп йўналишида ёшларни яхшиликка ундовчи қўшиқлар яратиш кераклигини, рэп йўналишидаги қўшиқларни давлат телеканалларида ҳам намойиш этилишига рухсат берилиши мумкинми, у телеканалларни катта ёшдагилар ҳам кўришлари ва шунинг учун рэп йўналишидаги қўшиқлар, мусиқа ҳам шунга муносиб бўлиши кераклиги, маънавиятга бой бўлиши муҳимлиги, ушбу рэп йўналишига махсус бадиий кенгаш тузиш кераклиги, ҳамда тузилажак бадиий кенгашга репни характерини тушунадиган ижодкорни бадиий раҳбар қилиб, қўшиқларни муҳокама қилган ҳолда, уларни телеканалларда намойишга тақдим этиш ва шу тарзда бу йўналишни кучайтириб, мустаҳкамлаш ҳақида ўз фикр ва таклифларини билдириб ўтди.

Йиғилиш қатнашчилари бу масалани кўриб чиқишларини маълум қилишди.

Йиғилиш иштирокчиларидан Тошкент Давлат Санъат институтидан Эстетика бўйича олим Маъмур Умаров сўзга чиқиб, "Озодбек Назарбеков Ижодий Маркази” бу борада яна бир қадам ижодий ўсиш бўлганлигини ва бу ёшлар учун катта имконият эканлигини таъкидлади. Шунингдек, эндиликда бу йўналишда ҳам даражани аниқлаш вақти келганлигини, репни аслида нима эканлиги, яъни рэп бу Америка шеъриятининг ритмлари бўлиб, бу йўналишда ҳам фақат яхшисини олиб қолиш кераклигини, имидж масаласида ҳам маънавий гўзалликка интилишимиз ва ёшларга ўрнак бўладиган даражада бўлиш зарурлиги, танқид қилиш осонлиги, лекин таҳлил қилиш қийин эканлигини, шунинг учун ҳам тўғри таҳлил қилиш кераклигини, битта қўшиқ яратиш учун бир нечта инсонлар меҳнати кетишини ва шунинг учун ҳам бадиий яхлитлик масаласига катта эътибор берилиши, ҳамда шу масалаларда ёрдам учун ёшлар мурожаат қилишлари мумкинлиги ҳақида, ўз фикр ва таклифларини билдирди.

Бир неча ижодкорлар ҳам рэп йўналиши борасида, ўз фикр ва таклифларини билдириб, рэп фестивали ўтказиш таклифини ҳам айтиб ўтдилар.

Йиғилишдан сўнг, Ўзбекистон Халқ артисти Озодбек Назарбековнинг ушбу йиғилиш борасидаги фикрлари билан қизиқдик.

Озодбек Назарбеков: -Бугун "Ўзбекнаво” эстрада бирлашмаси билан биргаликда Ижодий Марказимизга деярли барча рэперларини таклиф қилдик. Чунки, ўша рэперлардаги қандайдир тушунмовчиликлар, муаммоларни ечиш учун, уларга қўлимиздан келганча мутахассислар ёрдамида йўл кўрсатиш, имконият яратиб бериш мақсадида шу йиғилиш ўтказилди. Бу санъат мавжуд бўлиб, у барибир ўз фаолиятини кўрсатар экан, демак уни сайқаллаш керак. Бизни менталитетимизга мос келадиган кўринишини, шаклини ишлаб чиқиш керак деб ўйлайман. Чунки, бу санъат дунёда ҳам, ҳали бутунлай ўз шаклини топиб улгурмаган. Шунинг учун, ҳозирдан рэперлар билан очиқ-ойдин гаплашиб, бу йўналишни тўғри йўлга сола билиш, сифатини ошириш зарур.  Чунки, ёшлар бизни фарзандларимиз, уларга тўғри йўналиш, йўл кўрсатиб, қўлимиздан келганча ёрдам бериш, менимча бизни вазифамиз деб ўйлайман.

Йиғилиш ниҳоясига етганидан сўнг, "Озодбек Назарбеков Ижодий Маркази” билан ҳам танишдик. Ижодий Марказ 4 хонадан иборат бўлиб, қабулхона,   Озодбек Назарбековнинг кабинети, ижод ва суҳбат учун мўлжалланган хона, ҳамда кичик студиядан иборат экан. Бу Ижодий Марказга ёшлар истаган вақтларида мурожаат қилиб, ижодий ёрдам олишлари мумкин эканлигини ҳам маълум қилишди.

Ижодий Марказ билан танишиш жараёнида ҳам, ёшлар хонанда Озодбек Назарбеков билан ўзаро фикр алмашиб, баъзи ўзларини қизиқтирган саволларга жавоб олдилар.

 Феруза Фаттохова

Саида Вахобова