Ёдгор Носиров клипмейкер мархум Искандар Агзамов яъни, Скан Мультининг шогирди.

Жасур Шаметов эса, клипмейкер Баҳодир Йўлдошевнинг шогирди.

Бугунги кунда бу икки клипмейкернинг ўзлари ёш бўлсалар ҳам, кўплаб ютуқларга эришмоқдалар.

"Журналист-юлдуз” лойиҳаси бу сони  "Дубай” кафесида ўтказилди.

Лойиҳа шартига кўра, Ёдгор Носиров ва Жасур Шаметов иккови бир-биридан интервью олишлари, бунинг учун эса саволлар тайёрлаб келишлари керак эди.

Лекин, афсуски, иккови ҳам, савол ўйламай келишган экан. Шунинг учун ҳам, бу икки клипмейкерлар бир-бирларига импровизация тарзида ўйлаб саволлар беришди.

Биринчи бўлиб, клипмейкер Ёдгор Носиров Жасур Шаметовга савол беришидан лойиҳа бошланди.

Ёдгор Носиров: - Яқин орада кимни клипи ёки қўшиғи ёқди ва ўша ижодкорни ўзига бу ҳақида айтдингми?

Жасур Шаметов: - Мен бирор ижодкорга қўнғироқ қилиб, бу ҳақида айтмайман. Фақат кўришиб қолганимизда айтишим мумкин. Ҳаммани ўзига хос дасхати бўлади, бирор клипни кўрганимда қайси клипмейкер суратга олганлиги билинади. Агар менга бирор клип чиндан ҳам ёқса, мен албатта уни ким суратга олганлигини сўрайман.

 Ёдгор Носиров: - Хонанда Согдиана ҳозирда Россияда ижод қилмоқда. У Тошкентдалигида, кўп клипмейкерлар унга ижодий ёрдам беришган эди. Сен ҳам унга клип суратга олгансан. У сен билан келажакда ҳам бирга ишлаш таклифини билдирганми? Ҳозирда ҳам у билан ижодий ҳамкорлик давом этяптими? У сенга масалан, юлдуз бўлиб, машҳурликка эришсам, фақат сен билан ишлайман дегандек, ваъда берганми?

Жасур Шаметов: - Бундай гапларга ва ваъдаларга аҳамият бериш керак эмаслигини, мен йиллар давомида тушуниб етганман. Мен Согдианага ўша "Сен келма” қўшиғига, клип суратга олганимда, 19 ёшда эдим. Менда янги ижодий ғоялар жуда кўп эди ва уларни ижодимда кўрсатгим келарди. Бу клипни суратга олиш учун, хонандани бюджети унчалик катта бўлмаган. Ўша пайтда кейинчалик бирга ишлаймиз деган гаплар бўлган. Лекин, вақт ўтиб, ҳамма нарса ўзгарганидек, одамлар ҳам ўзгаради. Мен бундай бўлишида, ҳаммаси Согдианага боғлиқ деб ўйламайман. Ҳозирда бутун дунёда, кўпинча хонандалар режиссёрлар билан тўғридан-тўғри бирга ишламайдилар, яъни продюсерлар бор. Агар хонандани бирор продюсерлик маркази билан шартномаси бўлса, уларни мени ғояларим, қарашларим қониқтирмаслиги мумкин, бунга хафа бўлиш керак эмас. Фақат ишлаш ва яна ҳам яхши ишлаш керак. Ниманидир исботлаш учун эмас, янгилик яратиш, янада изланиш учун! Натижада эса, ўша инсонлар вақти келиб сенга қайтадилар. Ҳаммаси ўзингга боғлиқ.

Ёдгор Носиров: - Клипларингни бюджети унча катта бўлмаса ҳам, ўзига хос услубга эга ва уларни бемалол Европада ҳам, Москвада ҳам кўрсата олиш мумкин. Нима учун шунга ҳаракат қилмаяпсан?

Жасур Шаметов: - (кулиб) Мен бу ҳақида кўп гапирмоқчи эмасман. Лекин, қўрқмай шуни айтишим мумкин-ки, 2011 йилда кўплаб ҳамкорлик лойиҳаларини амалга ошириш ҳаракатидаман. Энди 25 ёшга кирдим ва ҳали ҳаммаси олдинда деб ўйлайман.

Ёдгор Носиров: - Отанг Бахтиёр Шаметов ҳам, режиссёр ва телевидениеда ишлайди. Бу соҳага кириб келишингда отангни ҳам ҳиссалари борми? Яъни, айтмоқчиман–ки, ижод авлодма–авлод давом этиб келяптими?

Жасур Шаметов: - Бир тарафдан албатта, ота–онани фарзанд ҳаётида ўрни катта. Авлодма–авлод давом этишига келсак, бунисини билмадим. Балки мен ўғил кўрсам, ўғлим футболчи бўлишни ҳоҳлар? Балки мен ўзим уни спортчи бўлишини ҳоҳларман. (кулимсираб) Чунки, ҳозирги кунда ёшларни ўзига тортадиган нарсалар, янгиликлар жуда кўп. Фарзанд, вақти келиб, ўз қизиқишига муносиб касбни танласа, биз ота–оналар буни назорат қилиб, қўллаб–қувватлашимиз ҳам керак. Шунинг учун ҳам, вақти келса кўрамиз.

Ёдгор Носиров: - Хонанда Канизани "Ҳис эт” клипини суратга олаётганингда, бу клипни шу қадар шов–шувларга сабаб бўлишини билганмидинглар? Ўзбекмиз, менталитетимиз бор. Клип юзасидан танқид бўлиб, уни телеэфирдан олиб ташланади деб ўйламаганмисизлар?

Жасур Шаметов: - Менга биринчи марта хонанда Каниза мурожаат қилиб, шу қўшиқни қўйиб берганида, унга шундай савол берган эдим: - "Шу нарсани телеэфирда қўйишади деб ўйлайсанми?” У эса шундай деди: - "Келинг, таваккал қилиб кўрайлик!” Шундай қилиб, биз таваккал қилдик! Менталитет деган сўзингизга келсак, мен қўрқмай айтишим мумкин, режиссёр, рассом, оператор сифатида ҳам ва умуман, четдан олиб қараганда ҳам, клипда ҳеч қандай эротика йўқ! Ярим яланғочлик ҳам, ёки одамни нафратини келтирадиган кадрлар ҳам йўқ!

Менга 16 ёшли бир ўзбек қиз қўнғироқ қилиб: - "Бизнинг менталитетга тўғри келмайдиган, эротика йўналишида клип суратга олдингиз!” деб савол берди. Ҳадеб, "эротика” деб қайтараверди. Охири мен уни ўзидан сўрадим: - "Ёшингиз неччида?” деб. У эса: - "16 ёшдаман” – деди. "Рус тилини биласизми?” – дедим. У "Йўқ” деди. Шунда мен жавоб қайтардим: - "Ёш экансиз, рус тилини билмас экансиз, унда айтинг-чи, эротика нималигини қаердан биласиз?” Яъни, у қиз ўзи эротика тушунчасини қаердан билади? Хўш, мен одамларга нимани тушунтиришим керак? Яхшиси, мен бу борада ҳеч қандай саволга жавоб бермайман! Ўзи бундай олиб қараса, эротика ҳам бир санъат, фақат уни чиройли кўрсата билиш керак назаримда. Бизда эса, афсуски, бу клипни эротика деб тушунишди. Кейинчалик эса, менга "гап сенда ёки клипда эмас, ҳамма гап, қўшиқ сўзларида” деб айтишди. Яъни, "ҳис эт ҳароратимни”, ҳамма мана шу қўшиқ сўзларига қарши бўлишган. Видеоклип эса, янгилик сифатида кўпларга маъқул келган экан.

Ёдгор Носиров: - Демак, сен биз бемалол бундай клиплар суратга олаверишимиз мумкин деб ҳисоблайсанми? Яъни, клипда қизни устидан шоколад қуйиб, яна нимадирлар . . .

Жасур Шаметов: - Нима учун йўқ?

Ёдгор Носиров: - Нима учун йўқ??? Агар ҳамма гап сен айтгандек сўзларда бўлганида ҳам, бу клипни телеэфирдан олиб ташлашарди деб ўйлайман.

Чунки, одамлар қўшиқ сўзларига аҳамият беришмади назаримда. Чунки, бу қўшиқ радиоэфирда кетганида, олиб ташланмади ва ҳозирда айланишда давом этмоқда. Лекин, клип суратга олингач, телеэфирдан олиб ташланди.

Ўзи клип ғояси кимники эди?

Жасур Шаметов: - Лекин, клипни дарҳол олиб ташлашмади-ку. Клип бир ой давомида намойиш қилинди. У ахир бадиий кенгашдан "А " категория бўйича ўтган эди. Клип ғояси ўзимники, рассом билан бирга ишлаганмиз. Лекин, бу клип, бирор клипдан олинмаган.

Ёдгор Носиров: - Хорижий клиплардан кўчирган клипларинг ҳам борми?

Жасур Шаметов: - Ижодда бўлган ва мен буни ҳеч қачон яширмаганман, ҳамда интервьюда ҳам айтганман. Ҳатто, хонанда Райҳоннинг "Ёдингдами” клипи учун  "Тарона” мукофотини қўлга киритганимда ҳам, мендан, "бу клипни кўчирганмисан” деб сўрашган. Мен эса, буни яширмаганман. "Нима учун?” дейишганда, "бу клип менга жуда ёқади” деганман. Гап шундаки, ғояни олишинг ва уни бутунлай бошқача яъни, ўзингни талқинингда кўрсатишинг мумкин. Бирор ғояни кўриб қолиб, ёқтирсанг нима учун уни ўзингни талқинингда кўрсатишинг мумкин эмас? Масалан, айнан ғояси бир-биридан олинган Ҳолливуд фильмлари ҳам бор.

Ёдгор Носиров: - "Суиқасд” фильмида рол ижро этишингга ҳам тўхталсак. Бу қандай юз берган? Кастинг бўлганми ёки ўзлари ролга таклиф этишганми?

Жасур Шаметов: - Фильм режиссёри Зулфиқор Мусоқов институтда менга бадиий раҳбар бўлган эдилар. Улар ва рафиқалари бизга яхши таълим беришган. Бунинг учун, улардан жуда миннатдорман. Бизга доим сценарийлар ёздиришар, янги фильмларни кўрардик, параллел равишда эса драма тўгарагида актёрлик маҳорати билан шуғулланиб, спектаклларда роллар ўйнардик. Фильмда рол ижро этишимга сабаб мана шу. Зулфиқор ака офисда ўтирганларида, мени кўриб қолиб, "шу ролни сен ўйнайсан” деганлар. "Қандай бўлар экан?” дегандим. Кейин сценарийни ўқиб кўрдим ва маъқул бўлди. Шу фильмда суратга тушдим.

Ёдгор Носиров: - Нима учун сен ўзинг ҳам режиссёр бўлмаяпсан? Ахир ҳозир кўп клипмейкерлар ва операторлар режиссёрлик қилишяпти. Ёки сен кино олишни ҳоҳламайсанми?

Жасур Шаметов: - Мен ҳамма каби иш тутишни ҳоҳламайман. Лекин, (кулиб) ким айтди мени кино олишни ҳоҳламайди деб? Вақти келса кино ҳам суратга оламан. Мен ҳеч кимга ҳеч нарсани, кино орқали ёки клиплар орқали исботламоқчи эмасман! Бу ижод, бу санъат, эркин ижод! Ҳамма нарсани ўз вақти-соати бўлади! Ҳозир кинофильмлар кўп. Масалан, кўпчилик томошабинлар премьерага келишади-да, кинони кўриб, шу ерни ўзида сценарийсини ўйлаб,  "мана бу эпизодни бундай қилса бўларди” деб ўтиришади. Агар яхши ғоя келса, сценаристлар билан ҳаммасини ўйлаб, бир яхши фильм суратга оламан.

Ёдгор Носиров: - Шогирдликка олиш масаласига қандай қарайсан? Шогирдликка оласанми ва шогирдларинг борми?

Жасур Шаметов: - Мен уларни шогирд демайман ва шогирд сўзини ёқтирмайман. Чунки, мен ўзим ҳали ёшман. Шогирд олмайман. Ёрдамчи қилиб олишим мумкин. Беркитмайман, кўплар мен орқали чиқишган. Кўпларни мақсади, Баҳодир ака билан танишиш бўлган. Пайтида келиб, ёрдамлашиб бирга ишлаганмиз. Нозим, Наримон, Саъдулла, Жонрид, Артём Малышкин (ҳозир Москвада МузТВда ишлаяпти) ва бошқалар.

Ёдгор Носиров: - Пул эвазига-чи шогирдликка оласанми? Мисол учун, 10 минг доллар эвазига?

Жасур Шаметов: - (кулиб) Ишонмайман! Келиб, 10 минг доллар бериб, бирор нарса ўргатинг дейишларига! (кулади) Шунча пули бор одам, ундай қилмайди. Агар шундай бўлиб қолса, мен унга "институтга кириб ўқи” дейман. Умуман, истеъдод ва қизиқиш одамни ўзида бўлиши керак. Гап пулда эмас! Мен ўзим институтда ўқиган вақтларимда ойим 400 сўм берардилар, йўл ойлик чиптам бўларди. Хонанда Райҳонга клип олган вақтимда, транспортда автобус ва метрода юрардим. Пул, ўўў деган нарса бўлмаган. Доим (кулиб) булочкахонадан қарз бўлиб юрардим. (жиддий) Ҳозир худога шукур, ундай эмас!

  Суратга изох: Хар иккиси секундантларига қўнғироқ қилиб маслахатлашиб олишиб давомлашади.))

Савол бериш навбати Жасур Шаметовга келди.

Жасур Шаметов: - Сиз билан биринчи марта танишганимга, 10 йил бўлибди. Бермоқчи бўлган саволим шундай. Бундан 10 йил аввал, яъни 19 ёшингизда нима сизга илҳом берар эди-ю, ҳозир орадан 10 йил ўтиб, нима сизга илҳом беради?

Ёдгор Носиров: - Умуман олганда, илҳом парилари бўлмаган ва мен ҳам шогирд тушганман. Яъни, раҳматли Искандар Агзамовга, (Скан Мульти) у пайтларда клип олиб, оператор бўламан деган мақсад бўлмаган. Мен жой гаплашиш, ёрдамлашиш каби ҳамма ишларни қилаверардим. Бир куни устозим, "камерага қараб тургин, сендан оператор чиқади деб айтди. "Шунча пайт мен билан бирга юрибсан, илҳом ҳам келади” деди. Ўшанда камерага қараганимда, ўзимни бошқача ҳис этганман. Биринчи марта камерага тушганимдан кейин, ўз-ўзидан дарҳол ғоя келмаган. Йиллар давомида илҳом ҳам, ғоя ҳам, амалиёт орқали, ҳаммаси секин-секин бўлиб келган. Ҳозирги кунда, мен китоб ўқишдан илҳом олишим мумкин. Охирги ўқиган китобларимдан, инглиз ёзувчиси О’Генрининг асарини айтишим мумкин. (номини эслай олмади) Китобдан кўп нарса оламан. Мен асарларни номини эслаб қолмасам ҳам, воқеаларни ҳаммаси ёдимда қолади. Китоблардан илҳом оламан ва қисқа-қисқа воқеаларидан ишлатганман.

Жасур Шаметов: - Биламан, сиз институтга, режиссёрлик факультетига ўқишга киргансиз. Сиз учун қайси бири муҳим? Ўқиш, билим, маълумот олишми ёки, моддий маблағ?

Ёдгор Носиров: - Мен ҳали ҳам, институтда 5 йилдир-ки, 2-курсдаман. Ҳали ҳам битира олмаяпман. Чунки, мен ижод билан ўқишни бирга олиб кета олмаяпман. Иш кўплигидан бўлса керак. Академик таътил олиб дегандек, лекин, барибир битираман. Чунки, институтга билим, маълумот олиш учун кирганман. Мен учун билим, маълумот олиш биринчи ўринда туради! Аммо, оилавий шароитимга кўра, моддий маблағ ҳам керак.

Жасур Шаметов: - (ҳазил билан) Машинангизга қараб, оилавий шароитингизни тушунса бўлади. Ҳазиллашдим!

Ёдгор Носиров: - (жиддий) Агар билим, маълумот олиш биринчи ўринда бўлмаганида, мен аллақачон институтни ташлаган бўлардим! 5 йилдан бери давом эттириб келмасдим, э, бўлди деб, чиқиб кетган бўлардим. Мен ўқишни, диплом олишни ҳоҳлайман. Лекин, оилавий шароитга кўра, шу нарсани бирга олиб кетиш, қийинроқ кечмоқда.

Жасур Шаметов: - Ҳаётдаги мақсадингиз? Сиз учун орзу нима-ю, мақсад нима ўзи?

Ёдгор Носиров: - Мени мақсадим яратиш, ижодимни кўрсатиш. Масалан, телевизорда, "Оскар” тақдимот маросими, "Канн” кинофестивалларини кўрганимда, мен ҳам ўша ерга интиламан, шундай мукофотлар олишни ҳоҳлайман. Бу орзу! Мақсадим эса, ҳар доим яратиш, тўхтаб қолмаслик, ижод қилиш! Мен орзу нима, мақсад нима деб ажратиб ўтирмайман. Орзу, бу мени орзуйим.

Жасур Шаметов: - Доим дўстларингиз шу ҳақида гапиришади. Нима учун ҳалигача оила қурмадингиз?

Ёдгор Носиров: - Шу йил худо ҳоҳласа, шунга қадам қўймоқчиман. Лекин, мени тушунадиган инсон йўқ! Масалан, сени рафиқанг, сени ижодкор сифатида тушунади. Мени шундай тушунадиган инсон йўқ. Мен учрашувга чиқаман, гаплашиб кўраман, лекин ҳеч топа олмаяпман.

Жасур Шаметов: - Ёдгор менга фақат тўғрисини айтинг, саҳнага чиққанингизда, мана яқинда "M&TVA 2010” тақдимот маросимида ҳам, тақдирланган вақтингизда кўзингиздаги ёшлар ҳақиқий эдими? Ёки атайлаб дегандек. . .  Яъни, ростдан ҳам шу қадар эмоция, кўзда ёш бўлганмиди ўзи?

Ёдгор Носиров: - (Ўша онларни эслаб) Ҳа, чинакамига кўнглим тўлиб, эмоция бўлган. Мен саҳнага чиққанимда, ҳамма ўзим босиб ўтган қийинчиликлар кўз олдимга келиб, хурсандлигимдан кўзимга ёш келади. Қийналганларим, қийналиб ишлаганларим самара бергани учун, (таъсирчанлик билан) одам бундай хурсандчиликдан йиғлаб юборади. Бу нарса, ҳар қандай одамда бўлади. Менда шундай нарса бор-ки, оддий кино кўрсам ҳам, тасирлансам йиғлаб юбораман. Жуда ҳам эмоционал инсонман. "Тарона” тақдимотида ҳам, "M&TVA 2010” тақдимот маросимида ҳам, кўз ёш, ҳаммаси чинакам эди. Атайлаб эмас. Ҳатто, бошқалар мукофот олса ҳам йиғлаб юборишим мумкин. Чунки, мен ўша инсонлар бунгача, қандай қийинчиликлардан ўтганини биламан.

Жасур Шаметов: - (кулиб) Мен мукофот олганимда, йиғламаган эдингиз-ку. (кулади)

Ёдгор Носиров: - (кулиб) Чунки, мен унда саҳнада тургандим-да.

Жасур Шаметов: - Доим ҳар қандай тақдимотда, Ёдгор Носиров албатта бошқалардан ажралиб туради. Ўз костюмларингизни қаердан оласиз?

Ёдгор Носиров: - Одатда тиктираман. Дизайнерга мурожаат қиламан. Чунки, негадир ўз размеримдаги кийимни топишим қийин.

Жасур Шаметов: - Спорт билан шуғулланасизми?

Ёдгор Носиров: - Боулинг ёқади, шуғулланаман. Теннис ҳам ёқади. Боулинг бўйича, ҳаваскорлар орасида чемпион бўлганман. "Юлдуз боулинг”га бориб тураман. Лекин, футболни ёқтирмайман, ўйнаб бир марта қўлим синган.

Жасур Шаметов: - Мана телеэфирни кузатсанг, ҳозирги кунда ҳамма, овози борлар ҳам, овози йўқлар ҳам қўшиқ айтишяпти дейиш мумкин. Бунга ким ёки нима сабаб деб ўйлайсиз? Нима учун бундай ҳол юз беряпти?

Ёдгор Носиров: - Бунга хонандаларни ўзлари сабабчи деб ўйлайман. Улар чиқишяпти, кейин эса йўқолиб кетишяпти. Хонандалар кўп, лекин сараланиб, овози борлари қолади. Тўғрисини айтсам, (ўйланиб, бироз сукутдан сўнг) билмадим, бу савол менга эмас . . . Нима учун улар телеэфирда чиқишади, бу бизга боғлиқ эмас. Улар ишлаб кўришади, ҳеч ким эшитмагач, мухлисларни ўзлари ажратиб олишади. Ундайлар ўз-ўзидан йўқолиб кетишади. Ҳаммасини вақт кўрсатади. Лекин, бир тарафдан омадга ҳам боғлиқ. Баъзи бирларни умуман овози йўқ, лекин, уларда ҳаммаси яхши, тўйларга ҳам боришади, яхши пул ишлашади.

Жасур Шаметов: - Негадир сизни клипларингизда асосийси, ўша хонандани чиройли кўрсатиш, чиройли орқа фон ва бир неча клиплардаги бир хил модел, ҳамда у модел ҳаракатсиз деса ҳам бўлади. Нима учун клипни бойитмайсиз? Пластика, хореография орқалими? Қандайдир кутилмаганда ҳайратлантириш йўқ? Учта клипингизни кўрдим, деярли бир хиллик. Мана, хонанда Дилмурод Мусаевни клипи, хонанда Сардор Раҳимхонни клипи. Клиплар жуда зўр суратга олинган, ҳаммаси аъло даражада. Лекин, негадир масалан, клипда суратга тушган моделлар ҳолатими, бир хил. Ўзи нимага алоҳида урғу берасиз? Операторлик ишигами ёки ғоягами? Ўзи бундай клиплар билан нимани кўрсатиб бермоқчи бўласиз? Нима учун сизда шундай йўналиш?

Ёдгор Носиров: - Ўзи умуман, Сардор Раҳимхонни "Эйфория” қўшиғини клип ғоясига кўра, у ерда қиз суратга тушмаслиги керак эди. Биз ўша куни, ўша жойида қиз суратга тушиши керак, деган қарорга келдик. У ерда кадрлар кўп эди, биз қирқиб ташлашимизга тўғри келди. Чунки, биз ўзимиз ҳоҳлаган нарсани кўрсата олмадик. Клип ғояси бўйича, хонанда у қизни кўради. Хонанда Дилмурод Мусаевни клипида ҳам, аввал бир қўшиқни эшитиб кўринг. Клип ғояси қўшиққа мос. Унга бир ноодатий нарса қилиб бўлмайди, томошабинлар буни тушунишмайди. Масалан, мана хонанда Каниза билан нима бўлди? Уни клипини кўплар тушунишмади. Сен ёшларга клип суратга оласан. Мен эса ёшларга ҳам, ёши катталарга ҳам клип суратга оламан. Мен ҳам бошқача клип суратга олишим мумкин. Лекин, буни тушунмасликлари ва қабул қила олмасликлари мумкин.

Жасур Шаметов: - Нима учун бунчалик ишонч билан айтяпсиз? Нега унда хориж клипларини кўришади?

Ёдгор Носиров: - Чунки, мен буни амалиётдан кўриб, шундай деяпман. Ким хориж клипларини кўряпти?

Жасур Шаметов: - Ҳамма!

Ёдгор Носиров: - Хориж клипларини 30 ёшдан ошгандан кейин кўришмайди! 30 ёшгача бўлганлар кўришади.

Жасур Шаметов: - Барибир клипларингизда кўп нарсалар ўхшашлиги ҳақидаги саволларимга жавоб бермадингиз? Нега энди қаҳрамонларда бир хиллик? Сиз  зўр декорациядан ҳам етарли даражада фойдаланмайсиз. Актёрларни ўйнатмайсиз. Улар худди статуэтка, ҳайкал каби ҳаракатланишади. Нега "детально” нарсалар қўшмайсиз? Масалан, хонанда Максимни бир клипини мисол келтирсам, оддий хонада олинган. Ғояси оддий, енгил, зерикарли эмас. Хонанда Филипп Киркоровни энг охирги клипи ҳам.

Ёдгор Носиров: - (бироз асабийлашиб) Сен мен шундай олишни ҳоҳлайман дейсан. Мен ҳам мана шундай олишни ҳоҳлайман. Тушуняпсанми? Мен кимнидир қаергадир осиб қўйишни, нимадир қилишни ҳоҳламадим. Буни сен қила оласан! Кимнидир қаергадир осиб қўйиб, ёки кимнидир шоколадда кўрсатиш. Мен бундай қилмайман, бундай қилишни ҳоҳламайман. Сен европаликларни ҳам ҳайратлантирадиган клиплар олишинг мумкин. Мен клип олаётган хонандалар эса оддийликни ҳоҳлашади. Улар Халқ артистлари! Нима учун Халқ артисти Зулайҳо Бойхонова клип суратга олдиряпти? Мана у сени ёнингга борса, унга қандай клип суратга оласан? Ҳа, албатта, унга мос клип суратга оласан. Уни ҳеч қачон очиқ кийимда суратга олмайсан тўғрими?

Жасур Шаметов: - Гап кийимда эмас! Гап ҳаракатда! Мен нега клипларингизда доим қизларни ва бошқаларни ҳаракатлари бир хил бўлади дедим.

Ёдгор Носиров: - Йўқ, улар бошқа-бошқа образларда чиқишган. Кўпинча, мен суратга олган клиплар кетма-кет ва яна бир вақтда, телеэфирда намойиш этилади. Яъни параллел равишда, натижада бир одамни дасхати бўлгандан кейин ўхшашлик ҳам бўлади-да. Бир вақтда суратга олган клипларимда, битта қиз суратга тушган бўлса, улар кетма-кетда қўйилганда, ҳар хил образ бўлса ҳам худди бир хилга ўхшаб қолади. Шунинг учун, шундайга ўхшаётгандир. У қизга бошқа ҳаракат қилдиришим ҳам мумкин, лекин буни бизда тушунмай қолишлари мумкин. Бу нарса қўшиққа ҳам боғлиқ. Масалан, "Давр” гуруҳини клипида ҳамма нарса қилиш мумкин. Лекин, хонанда Дилмурод Мусаевни қўшиғи ҳам бошқача ва унга ундай нарсалар қўшиб бўлмайди.

                                                                                      (узоқ баҳслашишди)

  Суратга изох: Хар иккиси энди адвокатлари билан маслахатлашишади.))

Жасур Шаметов: - Нима учун айнан сени клипларингни тушунишмайди деб ишонч билан гапиряпсиз? Сиз рамкада экансиз, сизни клипларингизни, томошабин тушунаётган экан. Умуман, томошабин ҳақида нима демоқчисиз? Улар буни тушунишни ҳоҳлашмаяптими ёки улар тушунишса ҳам, бунга аҳамият беришмаяптими?

Ёдгор Носиров: - Мен томошабинни савияси паст деб айтаётганим йўқ! Томошабинларимиз тан оладиган, тушунадиган клиплар менимча сюжетли, чунки бу уларга яқинроқ. Мен сени клипларингни ёмон деб айтаётганим йўқ. Масалан, халқ артистларига ундай клиплар олиб бўлмайди, тушунишмайди, қабул қила олишмайди. 

Жасур Шаметов: - Сизни томошабинингиз, мени томошабиним деган гап йўқ. Биз умумий томошабинлар учун ишлаймиз.

Ёдгор Носиров: - Мен шунчаки ажратиб фарқини айтяпман. Сен бошқача клип оласан, мен бошқача оламан. Ўзи олиб қаралса, сени  клипларингни 15 ёшдан 30 ёшгача, меники эса 20 ёшдан 40 ёшгача бўлган томошабинлар кўришади. Фарқ ана шунда, мен шундай деб ўйлайман.

Жасур Шаметов: - Лекин, сиз хонанда Лолага ҳам бошқача услубда клип суратга оласиз-ку. Буни тушунишди ва қабул қилишди.

Ёдгор Носиров: - Албатта. Лекин, эътирозлар ҳам бўлди. "Қийналар қалбим” клипида нима учун у кишанда, нега илдизлар ва ҳоказо дегандай. Хатлар ҳам келади. Кўпинча, осонроқ воқеали клиплар суратга олинг дейишади. Мен бу билан сени клипинг томошабинга ёқмаяпти деб айтганим йўқ. Балки вақти келиб, одамларга воқеали клиплар ҳам ёқмай қолар? Сен олаётган клипларга талаб бўлар. Менда ҳам ғоялар кўп, лекин томошабин тушунмайди ва қабул қила олмайди. Менда ҳам севгини бошқа нарсалар билан ифода этадиган ғоялар бор.

Жасур Шаметов: - Лекин, тушунишмайди деб бир рамкага тушиб олиб, бу битта қолипда қотиб қолиш эмасми?

Ёдгор Носиров: - Мухлисларим мени тушунмай қолишлари мумкин. Талаб ва таклифларга кўра, сюжетли клип оламан. Хонандани истаги ва талабидан келиб чиққан ҳолда.

Лойиҳа ниҳоясида икки клипмейкер ҳам, ўтказилган лойиҳа ҳақида ўз фикрларини билдиришди.

Ёдгор Носиров: - Жасур Шаметовни ижодини кузатаман. Вақти келса, бир-биримиздан маслаҳат ҳам сўраймиз. Бу инсон ҳақида гапирсам, гап жуда кўп. Жуда ҳам ўз ишига масъулиятли! Иккимиз рақобатчи бўлмасак ҳам, иккимизни бир-биримизникўнглимиздаги гапларни ёритдик.

Жасур Шаметов: - Ёдгор Носиров билан доим кам учрашамиз. Бу лойиҳа орқали кўриштирганингиз учун  жуда миннатдормиз. Чой устида шундай суҳбат қилдик. (кулиб) Энди биз, яқин 2 йил ичида, ким бир-бири ҳақида нима деб ўйлашини биламиз. Ҳазил албатта.

(иккови ҳам кулиб юборишди ва самимий, дўстона хайрлашишди)

Лойиҳа давомида икки клипмейкер савол ўйламай келган бўлсалар ҳам, ўйлаб-ўйлаб, изланиб бир-бирларига узоқ ўйлаб ўйлаб, саволлар топиб беришлари қизиқарли бўлди назаримда. Шунингдек, лойиҳа давомида улар гоҳ ҳазил, гоҳида эса жиддий тарзда баҳслашиб ҳам кетдилар. Лекин, лойиҳа ниҳоясида, ҳазиллашиб, кулиб, бир-бирлари ҳақида самимий фикрлар билдирдилар.

Саида Вахобова  ёзиб олди.