ТВМ ТЕЛЕКАНАЛИНИНГ ЯНГИ ЙИЛГА БАҒИШЛАНГАН

"ЖУФТ БЎЛСИН!” БАЙРАМ КЎРСАТУВИНИ СУРАТГА ОЛИШ ЖАРАЁНИДАН РЕПОРТАЖ

25 декабрь куни «Либослар галерияси»нинг иккинчи қаватида, ТВМ телеканалининг янги йилга бағишланган байрам кўрсатувини суратга олиш ишлари бўлиб ўтди. Унда ТВМ ижодий жамоасидан ташқари, кўплаб машҳурлар иштирок этдилар. Улар орасида яқиндагина бўлиб ўтган M&TVA тақдимоти ғолиб ва ғолибалари, ҳамда номзодлари ҳам бор эдилар.

Соат 16.00 да суратга олиш майдонига кириб келганимизда, ТВМ телеканали ижодий жамоаси суратга олиш жараёнига тайёргарлик кўраётган эдилар. Бизни ТВМ бошловчиси Роксана хушкайфиятда кутиб олди. Бироз вақт ўтиб, хонандалардан Сардор Раҳимхон, Шаҳриёр, "Беном” гуруҳи кириб келишди. Сўнг, актёр Адиз Ражабов ва "Божалар” гуруҳи солисти Жаҳонгир Позилжонов ва бошқалар суратга олиш майдонига кириб кела бошладилар. Бу пайтда байрамона безатилган саҳнада, бир неча раққоса қизлар ўз чиқишларини машқ қилиш билан банд эдилар. Ниҳоят, режиссёрлар машҳурларни безатилган байрам столлари атрофига ўтказа бошлашди.  Хонандалар Нилуфар Усмонова, Шохруххон, Зоҳиршох Жўраев, Шахзод гуруҳи солисти Рашид Холиқов, Сардор Раҳимхон, Райхон, Зиёда, Жаҳонгир Позилжонов, Шаҳриёр, Каниза, актёр Адиз Ражабов, актриса Шахзода Матчоновалар билан боғлиқ, суратга олиш ишлари бошланди. ТВМ телеканали бошловчиси Роксана меҳмонлар билан суҳбатни бошлаб юборди.

Барча байрамона либосларда ва хушкайфиятда, кулиб бир-бирларини кириб келаётган байрам билан табриклашар эди. Бу орада суратга олиш майдонига кириб келган актриса Дилноза Кубаева, актёр Алишер Узоқовлар суратга олиш ишларига тайёргарлик кўра бошладилар. Маълум бўлишича, улар ушбу кўрсатувда бошловчилик қилишлари керак экан. Кўрсатувда улардан ташқари яна, ТВМ телеканалидан Роксана ва Жаҳонгир Шаҳобиддинов ҳам бошловчилик қилишаётган эди.

Хонандалардан биринчи бўлиб, Нилуфар Усмоновани чиқиши суратга олинди. Телеканал учун суратга олиш ишларидан сўнг, Нилуфар Усмонова сайт учун ҳам суратларга тушди. Сўнг, бошқа хонандаларни ҳам навбатма-навбат чиқишлари суратга олина бошланди.

Хонанда Сардор Раҳимхонни қўшиғига меҳмонлар вальсга тушдилар.

ТВМ бошловчиси Роксана билан ушбу байрам кўрсатуви ҳақида қисқача суҳбатлашдик.

Роксана: - Бу кўрсатув режиссёрлари Отабек Қосимов, Ботир Маматиллаев. Ҳар йилги "Топ-10” кўрсатувини байрам концерти ўрнига, бу гал мана шу байрам концерти ўтказиляпти. "Жуфт бўлсин!” деб номланади. Бу ерда бутун жамоа меҳнат қиляпмиз. Концертда ТВМ телеканали билан бевосита мулоқотда бўлиб келаётган барча хонандалар, актёрлар ва актрисалар иштирок этишмоқда. Суратга олиш ишлари кундуз соат 16.00 дан ошганда бошланди, бир неча соат давомида бўлиб ўтади. Тунги  соат 24.00 да юлдузлар иштирокида, ТВМ гимни ижро этилиши ҳам суратга олиниши керак. Бу кўрсатув 31 декабрдан 1 январга ўтар кечаси, соат 24.00 дан кейин эфирга кетади. Бошқа концерт ва кўрсатувлардан фарқи, бу ерда 5 йил давомида M&TVA тақдимотида қатнашган, номзод ва ғолиб бўлган хонандалар, актёрлар ва актрисалар йиғилишган.

Бу орада, режиссёр Рустам Саъдиев, режисёр-клипмейкер Ёдгор Носиров, актриса Лола Элтоева, хонандалар Азиз Ражабий, Манзура, Зулайҳо Бойхонова, Зебо, Гули Асалхўжаева, Нигина Набиева, гуруҳлардан "Сато” гуруҳи, "Шод” гуруҳи, "Марка” гуруҳи йигитлари, янги ташкил этилган "Беназир” гуруҳи ва бир неча ёш хонандалар ҳам, столлар атрофидан жой олдилар.

Байрам кўрсатуви бошловчиларини умумий чиқишлари суратга олинди.

Суратга олиш жараёнидаги энг қизиқарли ҳолатлардан бири, хонанда Зебо оппоқ тирик қуёнчани кўтариб, саҳнага чиққани бўлди. У гўёки, жажжи қуёнчага севги изҳор қилгандек, уни қўлида кўтариб, унга қарата қўшиқ куйлади. Шунингдек, Манзура ва Шаҳриёр дуэти суратга олиб бўлингач, хонанда Шаҳриёр кутилмаганда, кимнидир пародия қилиб, саҳнага тиз чўкиб, сўнг адашиб қилгандай, ўрнидан туриб кетди. Умуман, бутун суратга олиш жараёни давомида энг қувноқ ҳолатда юрган ҳам Шаҳриёр бўлди. У ҳамкасбларининг қўшиқларига берилиб турли рақсларга тушди.

Навбатма-навбат кўплаб хонандаларни чиқишлари суратга олинди. Ҳар бир хонандани чиқиши суратга олинаётган вақтда, байрам столлари атрофидаги ҳамкасблари, қарсак чалиб, қўллаб-қувватлаб турдилар ва рақсларга тушдилар. Айниқса, Шахзод гуруҳи солисти Рашид Холиқовни чиқишини, ҳамма йиғилганлар жуда кўтаринки кайфиятда кутиб олишди. Актёр ва актрисалар ҳам, стол атрофида ўз байрам табрикларини билдирдилар. Буларни барчаси, албатта видеотасмага муҳрланди.

Ёш хонанда Ҳожимурод Бекчановни чиқиши суратга олинаётган вақтда, кутилмаганда техник носозликлар юз бериб, суратга олиш ишлари бир неча марта тўхтатилди. Шунингдек, баъзи ёш хонандаларни чиқишларида, қайта дубллар суратга олинишига тўғри келди. Бир неча марта, меҳмонларни ўтирган жойлари ўзгартирилди. Бир сўз билан айтганда, бу жараёнларни кўриб, ҳар бир кўрсатув ортида, ижодий гуруҳнинг қанчалик мураккаб меҳнати турганлигини ҳис қилдик.

Чиқишлари суратга олиб бўлинган хонандалар, актёр ва актрисалар, барча билан хайрлашиб суратга олиш майдонини тарк эта бошладилар. Соат 22.00 дан ошганда, суратга олиш майдонида бироз танаффус эълон қилинди ва  қолганларга соат 22.30 да суратга олиш майдонида бўлишлари ҳақида айтилди.

Янги йил байрамига бағишланган "Жуфт бўлсин!” кўрсатуви қандай чиққанлигини ва унда иштирок этган санъаткор-ларнинг байрам табрикларини, ҳазилларини, Дилноза Кубаева ва Алишер Узоқов қандай бошловчилик қилганларини, барча-барчасини 31 декабрдан 1 январга ўтар кечаси, ТВМ телеканали орқали, M&TVA тақдимотининг теленамойишидан сўнг, соат 24.00 дан кейин кўришингиз мумкин.

Феруза Фаттохова

Саида Вахобова