Бир хунобман, азобимдан алам тортар... нима кутарман?

Кетганлар қайтар балки, аммо ўша илк кўринганидекми?

Кўзлар қурсин, ярқ этиб кўрдим дегани, мана чирой, мана ўзга, узма кўзинг айтгани...

Кетганлар қайтилмайди, худди келгани каби, кўзингни юм, адашганди рангларида, нурларию чиройида...

Бир хуморман, ғазабдаман ўксик тутар... нима истарман?

 Жим қолганлар сўзлар яна, аммо илк наводекми?

Қулоқ қурсин, бу мусиқа деб тинглашга берилгани, мана қўшиқ, мана оханг, тингла уни дегани...

Жимлар энди сўйламаслар, худди куйлаган каби, кутма овоз, адашганди таронада, нағмасию ширасида...

Афсусдаман хотиранинг сохталигидан,  тетикману мудроқ тутиб кўрган тушимдан...

Нима кутай вафоси йўқ, тайини йўқ бебурд бўлган бу инсондан? Яна ундай бўлмайди у, қайтарса хам янгитдан, лойиқ эмас  яшамоққа тўйиб сени мехрингдан  ...

Юрак қурсин лип-лип этган, юзим қурсин ял-ял ёнган, кўзим сотган ёниб учқун... мағлуб бўлган қалбим шу кун...

Синдирганлар тиргак бўлмас, воз кеч ундан,  майли алам ютсин танни,

Тиндирганлар оловлатмас, титма кулни,  тинч қўй куйган бу жонни  

Дарс бўлгани ёр бўлмайди, тўхта хозир, айбламасдан хаммани....

                             Сотқинлар соғинилмайди, унут уни, содда мехринг қурсин сани...

(c) Sayyod