Шахзоданинг концерти қай тарзда ўтиши, эшик олдиданоқ билинди... Илиқ атмосфера ва дид кўчаданоқ сезиларли. Илиқлик саройга кираверишда, уччала эшикни хар бирида хам кўча тарафдан ва хам ичкарида Шахзоданинг фанклуби аъзолари мезбон сифатида ташриф буюраётганларни кутиб ола бошлашидан бўлса, уларнинг футболкаларидаги шарқона стильда ёзилган "Хуш келибсиз" ва  унинг фонидаги смайликнинг (кулгич), футболканинг орқа тарфидаги Шахзода ёзувидаги хамоханг палитра ранглар, бу йилги Шахзоданинг баннеридаги ёзув рангларига монанд.

Бошқа фанклублардан ярқ этиб яна ажралган тарафлари  шар ёки бошқа хеч қандай ортиқча артирибутлар ишлатмай, хар бирида Шахзода номи ёзилган  қизил ленталар бўлиб, иштирокчилар ундан турлича фойдаланган, кимдир бўйнига, ким қўлига кимларда эса таёқчада бант билан илинган.

Бу жуда нафис ва Шахзоданинг концертига мос дидли кўринишга эга бўлди.

Шахзоданинг гримеркасида унинг соч турмаги ва макияжига жавобгарлар қаторида, соғлиғига хам жавобгар врач навбатчи бўлиб турди.

Сахнадан илк кўзингизга ташланадигани бу сўзсиз қоп-қора ва йилтиллаган ойнадек пол. Икки четда махсус қурилган созандалар учун ярим айлана сахналар ва уларни пастига монитор хошия қилинган, орқада 5-та вертикал монитор , орасида чироқлар, тагида пирамидасифат зиналардан ташкил топган сахна бўлиб, ичига махсус лифт қурилган ва дастур давомида у орқали кетиш ва пайдо бўлишлар амалга оширилди. 

Сахнанинг томошабинларга яқинроқ жойида яна бир сахнача бўлиб у дастур сўнггигача шунчаки сахна бўлиб тураверди лекин, "Тўкилиб" қўшиғида, Шахзоданинг клипдаги айланишини у сахнада амалга оширди . Мазкур сахна хам махсус равишда айланишга мослаштириб қурилган. Шунингдек, сахнанинг олди тарафи томошабинларгача зиналар билан туширилган, бошқа концертларда биринчи қаторларда  сахнадаги харакатлар ва хонандани оёқларига кўзингиз тўғри келса, Шахзоданинг концертида сахна анча паст туширилгани, одамларга қулайлик яратган.

Дастур "Қўллар тепага" қўшиғи ва унга ишланган сахна кўриниши билан бошланди. Илк қўшиққа ишланган сахна кўриниши бирда томошабинларни ўзига ром этиб қўядиган эффекли тарзда бошланди. Тилларанг нақшлару белбоғи билан ясатилган қоп қора чопонлардаги раққос йигитлар ва қўлларида соз. Қизиғи у созлар бирдан елпиғич каби очилиб созлар 5-6тага кўпая бошлади. Супер бошланиш!

Шу ўринда раққос ва раққосаларнинг бир текис бўйлари баланд эканлигини хам эътироф этиш керак. Ёдингизда бўлса, Шахзода билан "Кундалик шоу"нинг бир сериясида у хар бир раққосни битталаб кастинг қилиб йиғиб юрганини кўрсатгандик.

Раққослар либоси Шахзоданики билан уйғунлашган ва айтиб ўтиш керак, либослар хам дидли ва савлатли(миди? солидно). 

Дастур ўрталарида Шахзодага аталган табриклар тилаклар ва истаклар онлари). Фаррух Каримовичдан то менинг севиимли хонандам Нюшагача. Нилуфар Усмонова, А-студио, Смэш, Джиган, МузТВ директори Армен Давлетяров ва яна Россия шоубизнесининг ярқ этган ном сохиблари Шахзодани концерти билан табриклашди. Охирида Др.Кости табриклагач, уларнинг дуэти мусиқаси янгради, сахнада кейинги блок давомланди.

Чико қўшиғида раққослар залга тушиб баланд овозда қўшиқ номини овоза қилиб юришди.

Лекин, Шахзоданинг рус тилидаги промоси бўлган қўшиқларни яхши кутиб олишди. Яна янги бўлишига қарамай бир инглиз қўшиғи   махорат билан куйлангани билан хам, хаммани ёдида қолган бўлса ажабмас. Овоз имконияти нималарга қодирлигини шу қўшиқда яхшигина намоёнлай олган. Номи ёдимда қолмадию,  қўшиқда юқори пардаларда ва Шахзодага хос бўлмаган баланд овозда куйлаган қўшиғини, агар ким куйлаётганини айтмаса , Шахзода деса ишониш қийин. 

"Қўллар тепага" қўшиғини инглиз тили турида, орқа экранларда унга ишланган голограмма эффектли видео лавха концертнинг ёрқин фишкаларидан бири бўлди. Уни тасвирлаш жуда қийин, кўриш керак. 

Либослар бежирим, зеро бу Шахзода, ажабланарли жойи йўқ, бу тахаллус брендининг икинчи синоними элегантлик эканлиги сир эмас. 

Алвон пардалар сахнани ёпиб, шундай ажиб фонда раққослар тангони ижро қилишди. Ёдингизда бўлса олдинги йил Шахзода тангога ўзи раққос йигит билан тушганди, бу йилги хомиладорлик холати туфайли , буни раққослар амалга оширишди. 

Фон учун 425 метрлик пардалар саройга илинганлик сабабини шунда тушундим. Алвон ранглардаги эхтирослар уйғунлиги тангода жуда чиройлик кўринди...

Шохруххон билан дуэт бошланиши қизиқ бўлди, орқа монтиторларда сахнага шошиб келаётган Шохрух тасвирланиб, лифтдан чиқиб келди. Шошган Шохруххон Шахзода билан Шошмани куйлади))) ана сизга "Ш"дан тез айтиш

Сахнада қўшиқ рухиятига мос сахна кўриниши тақдим этилди. 

Саксофон садолари билан куйланган "Кечалари" қўшиғи энг омадли микс деса бўлади. Қўшиқ жуда ажойиб чиққан.

Дастур сўнггида "Қўллар тепага" мусиқаси бўлиб, Халима келинлик либосида чиқди ва залга гулдастани отди. Суратда учиб келган гул ва кимга насиб этгани хам тасвирланган:

 Дастурда яна ёдда қолган онлар бу "Бу мухаббат" қўшиғида Шахзоданинг фанклуби одамларга ромашка тарқатишгани ва фанклубдан бир аъзо Шахзодага гулчамбар тақиб қўйгани бўлди.

Фишкалардан...йўқ, кўпроқ кутилмаган, ёрқин  ва қизиқ холатлардан бири бу "Айт" қўшиғини хоразмча наволари пайтида, хоразмча бўлмай, шартта Фарғонача мусиқа бўлиб, Шахзодани миллий либосларда йигитлар ўраб олиб, сахнани бир чеккасидан, то бошқа чеккасигача  Фарғонача рақс хиромида ўйнаб боришгани бўлди. Шахзодага бу жуда ярашган.

Илк кунида мехмон бўлганлар Лоланинг икки синглиси Анора ва Асал, машхурлардан Шахноз ва Нигина Набиевалар бўлишди.

Концертнинг афиша ва баннерларидан билганингиздек, дастурнинг бош ахборот хамкори сифатида хар бир кунидан қизиқ лавхалар ва янада ёрқин сифатли суратларни тақдим этиб борамиз.