Отажоновлар сулоласининг  хозирги кундаги кенжа давомчиси бўлган Али Отажоновни мусиқий каналларда учратиб бўлмай қолди.

Бироқ, унинг чехраси шахар кўчаларидаги фильм баннерларини безаб турибди. Навбатдаги янги фильмда хам яна бош рольда Али Отажоновни учратиш мумкинлиги ва ижодий жамоа хам аввалгиси эканлигидан икки савол туғилди:

"Али Отажонов хонандаликдан актерликка ўтдими?” ва "Режиссернинг икки карра таваккали сири нимада?”

Али Отажонов:- Хаётда унчалик гапга чечан эмасман ва хамиша актерлик қўлимдан келмайди деб ўйлардим. Илк маротаба "Айрилиқ” фильми хам,  ўзига хос тажриба сифатида, ижодимдаги бу қиррани хам синаб кўриш  имкони бўлди. Лекин бир шарти билан:  актерликка берилиб эмас, ўзимни боримча намоёнлайман. Ўша хаётдаги ўз хиссиётларим, характерим, кулишимдан то турли эмоционал холатларимни реал хаётдагидек кўрсатиб бераман дедим.

Суратга олиш давомида, нега индамаяпсизлар, балки ниманидир нотўғри ўйнаяптгандирман? деб мурожаат хам қилдим, лекин, ижодий жамоани ролим қониқтираётган эди. Кўзинг билан ижро қила оляпсан, бу асосийси деган жавоб олдим.  Қизиғи, фильм премьерасидан то бугунги кунгача ролим борасида танқид эшитмадим хам.  У фильм бошқа аксарият фильмлар каби стандарт равишда яхшилик билан хам тугамаган эди.

Мана бу,  янги "Ожиза” фильмида хам бош роль ўйнашимга , кўпроқ жараёнга қизиқиш кучайгани бўлди.  Қўшиқ промоси билан турли зиддиятлар барьерларни кўпайтираётган паллага тўғри келдик, нархлар ошган  ва хоказо, бу ижодкорни кўнглига таъсир қилади хамда , ижодий жараённи бошқасида имконият  етарли турганида, ўзига тортиб кетавераркан.  Актерликдаги ижодда енгилроқ нафас олганим ва бу жараён ўзимга хам қизиқ бўлгани учун хам , бу фильмда иштирок этяпман.

"Айрилиқ” фильмидан кейин таклифлар кўпайиб,   3-4та бошқа фильмларга таклиф бўлдию, лекин, менимча бошқа режиссер билан ишлаш менга қийин бўлса керак.   Дурдона Тўлаганова илк фильмданоқ мени роль эмас, ўзимни ўша сценарийдан келиб чиққан холда намоёнлашимни тушуниб, ортиқча актерлик вазифасини юкламади. Бошқа фильмларни кузатсам, менимча , ўзим истамаган бўрттирилган хиссиётни ижро қила олмасам хам керак деган фикрга келаман.

"Ожиза” фильмини суратга олиш ишлари хорижда хам бўлди, фильмда ёшларнинг хориждаги хаёти хам кўрсатилган жойлари бор.

Саундтрекни эса, созандаларим ва ижодий жамоам билан ўтириб , шунчаки  бир келган ғояни куйлаб турганимда, укам Жама Отажонов уни ривожлантириб, матн ва мусиқа билан ишлаб, "Хаёт” деган қўшиғини ёзиб қўйдик.

"Ожиза” фильмини томоша қилгач, бунақаси хаётда бўлмайдику деган нарса бўлмайди. Сабаби фильм реал воқеаларга асосан суратга олинди ва томоша қилиб бўлгач, ха,  бу хаётий бўладиган воқеалар дейсиз.

Ўзимга таъсирли бўлгани бу 7 ойлик туғилган чақалоқлар бўлимидаги суратга олиш жараёни ва актрисанинг телбалик сахнасини  ижро этадиган лавхалари бўлди. 

"Ожиза” фильми

Сценарий муаллифи ва режиссер  - Дурдона Тўлаганова (Бу фильм унинг 8-чи режиссерлик иши)

Оператор - Джонрид Сагдиев

Ролларда:  Али Отажонов, Суғдиёна Азимова, Тўти Юсупова, Анжелика Эсимбетова ва бошқалар

Саундтрек:  "Хаёт”- Али Отажонов ижросида

Мусиқа ва матн - Жама Отажонов

Илк фильм учун янги чехра яхшигина таваккалликни талаб қилади, яна иккинчи фильмга хам уни таклиф қилишда икки карра таваккал, зеро мавжуд бўлган "паровоз” тушунчаси (бошқа рейтингдаги машхур иштироки билан эътиборни жалб қилиш) билан қарайдиган бўлсак, фильмда бошқа машхур рейтингдаги чехраларни хам  учратмаймиз.

Дурдона Тўлаганова:- Али Отажоновни илк дебюти "Айрилиқ” фильмига таклиф қилганимда, ижодий жамоамдан то продюсерларгача хамма қарши бўлганди. Сабаби, фильмнинг муваффақиятида барибир актернинг рейтинги хам ўзига хос хиссаси бўлади.  Лекин мен,  агар Али бўлмаса бу фильмни суратга олмайман деб туриб олдим. Чунки бу фильмни мен ўзим кўргандек тақдим этишимда Али мухим эди. 

Мен учун кўзи билан ишлай оладиган, нигохлари орқали томошабин билан мулоқотда бўлиб, аксарият хиссиётларни кўзи билан етказиб берадиган қобилият мухимроқ.  Али Отажоновда эса бу бор, у кўзи билан яхши ишлайди.  Али  билан илк хамкорлик ишим,  ўша даврда премьера қилинган фильмлар орасида,  энг кассабоп фильм бўла олди ва хозирда у фильмга талаб бўлгани боис хам, иккинчи маротаба   намоиш қилиш кетмоқда.  Жудаям кўплаб қизлар Алини телефон рақамини мендан сўрашмоқда.  Илк хамкорлик учун жуда  омадли бўлди.

Хозирги "Ожиза” фильми аслида реал воқеаларга асосланган фильм бўлиб, бир актрисамизнинг хаётини кўрсатамиз.  Алига партнер танлашда қийналдик ва Суғдиёна Азимова танланганида, ижодий жамоа ишонқирамай қаради,  бир бирига мосмасдек туюлганди.  Тайёр махсулотни томоша қилгач, хозир жамоамиз мени танловим ўринли бўлганини  маъқуллашмоқда. Тайёр фильмни кўргач, яна томошабинлар бахо беришар.   

Рейтингдаги бўлмаган актернинг "Мен  фақат ўзимни  намоён қиламан, ортиқча роль ижро қилмайман” деган режиссер олдига қўйилган талаби,   эриш туюлса керак  ва ўз характери билан ёндошадиган актер билан  суратга олиш жараёнида ишлаш хам қийин бўлса керак.

Дурдона  Тўлаганова;-  Тўғри,  характер тарафлама қийин кечади.  Масалан илк дебютидаги фильмда бир лавха бор эди, унда қизни онаси хақида "Ойим” демайман, мен уйланмаганман, "Ойинг” дейман  деб туриб олганди. Дубляжда барибир  "Ойим” деб ўзгартириб юбораманку десам хам , йўқ деб оёқ тираб турганди. Мана шуни устида бироз тортишгандик, лекин уйланганидан кейин,  бу муаммо ўз ўзидан хал бўлди. 

Асосийси, Али вазифани уддалаб беради,  янги актерлар худди пластелиндек, ўзинг истаган шаклга келтираверасан,  нимани ясасанг,  шуни кўрсатиб беришади, рейтингдаги актерларимиз эса ақл ўргатишни бошлашади.  Рольга ўзини версияси билан ёндошишга харакат қилади, аммо, режиссер ўзи кўрган нарсани суратга олиб тақдим этади ва бунда бошқача ўзгартириш ўринсиз. Шунинг учун хам,  янги чехралар билан ишлашни афзал биламан. 

"Ожиза” фильми томошабинларни бефарқ қолдирмаслигига ишонаман, зеро,  реал воқеаларга асосланган мелодраммада,  биз билган  бир актрисанинг хақиқий хаёти жонланади.