Бугун Ўзбекистонда хизмат кўрсатган артист Шухрат Қаюмовнинг уч кунлик жонли ижродаги концертига старт берилди.

Дастур бошлангач, сахна очилмадию, қўшиқ куйланяпти... Шухрат Қаюмов залнинг орқа тарафидан халқ орасидан сахнага куйлаб чиқа бошлади.



Шухрат Қаюмов сахнадан туриб, бугунги кундаги Марди Майдон лойихаси орқали тарғиб этилаётган жонли ижро учун Ўзбекнаво эстрада бирлашмасига ташаккур изхор этди.

Жонли ижрода куйланиш қахрамонликдек қабул қилинаётгани, аслида бу оддий хонанданинг касби тақозо этган бурчи хақида гапирган Қаюмовни фикрига қўшиламан лекин,  бугунги даврда жонли куйлаётганлар қахрамондек кўринаётганига кимлар сабабчи экан деб савол бергим келди. Афсус у сахнада, мен эса томошабин эдим шу тобда))

Қани энди Шухрат Қаюмовдек барча хонандалар фикрласа? Рости хам хонанданинг бурчи куйлаш, овозни мингта дастур билан тўғирлаб  ёзиш ва уни қўйиб бериб,  оғиз қимирлатиш  эмаску.



Хонанда Дилафруза Мирзаева билан дуэт куйланди. Биринчи блокка якун ясашни имконияти чекланган болакайлар (кар ва соқов) интернатидан иқтидорларга берилди.







Танаффусни хажвий монолог билан Тўти Юсупова давомлади. Шухрат Қаюмов иккинчи блокни айнан шу монологни давомига театрлаштирилган она ва ўғил сухбати сахна кўриниши билан давомлади.



Она мавзуси яна бир сахна кўринишида давомланди. Лекин шахсий фикримча бу ўғлини соғинган она матни ғалатироқ туюлди. Ўғлини сизлаб мурожаат қилганигами, ё онанинг гап сўзларида эркатойлик аломатлари (гаплашмайман сиз билан хафа бўлдим каби) бўлгани сабабли, она ва ўғил эмас, бу сахна кўринишига  икки севишган сухбати матни ўзгартирилганга ўхшаб кетди. Билмасам, ўғилни сизлаш майлию лекин, халиги эркалик онага ярашмаган деб хисобладим.



Кейинги танаффусни ЭлДиДо гурухи акапелласи ва Шерзодбеклар давомлашди. Концертларда бирровчилик билан ярқ этган Элдорбекни ўрнини шу Шерзодбек босмоқчи кўринади))).
Ундан кейинги кичкина йигитча, Шухрат Қаюмовни шогирди экан у хам куйлади. Шу кунги дастурни ягона фонограммада куйлаган хонандаси шу йигитча бўлди. Болакайга мумкин(дир) майли..))



Яна Дилафруза билан дуэт, рақсида Ўзбекистон халқ артисти Саида Мансурхўжаева.

Дастурда жами 21та қўшиқ куйланди. Шухрат Қаюмов уч либос: оқ, кўк ва қора (тўқ кулранг) ялтироқ костюм шимларда намоён бўлди.

Концерт давомида овоз операторлари айби биланми ё репетицияда саундчек (созламалар) қилишмаганми, хуллас кўп маротаба техник носозликлар  бўлди. Жонли ижрода, бўлиб туради деймизу  лекин,  овоз операторларига менимча бу бахонадек қўлланишини истамасдим, шунча созанда ва хонандалар харакат қилишяптими, концертдан аввал ва концерт давомида ўз ишларига диққат ва эътиборда бўлишларини истардик. Бахонанинг сабаби бўлмайди, натижани у безамас.



Бевосита жонли ижродаги концерт хақида умумий фикр билдирсам, Шухрат Қаюмовни куйлаш махорати аъло даражада. Фонограммасидан ажратиш мушкул. Жарангдор овоз сохибига уч кунлик концертлари омадли ўтишини тилаймиз.



Суратлар муаллифи Сарвар Зохидов