"Юлдузнинг қўшниси" муаллифлик лойихамизнинг илк Улуғбек Қодиров хақида бўлган сонидан , жуда кўпчилик бу лойихамизга қизиқиб қолганини сири, четдан назар, машхурлар хақида муқобил, гувохлик фикри ва   улар хақидаги маълумотларни ноанъанавий тарздаги етказилиши бўлди. 

Эндиликда бу лойихамиз давомланади. 

Бугунги қахрамонларимиз УММОН гурухи!

    Уммон гурухи йигитларининг манзилларини тахминан билар эдикку, лекин аниқ қайси кўчалигини билмасдик.  Ўша кўчалар атрофларида учраган одамлардан Уммончиларнинг манзилини сўраганимизда 2 кўча наридаги махалла бўлсада, айтиб кўрсатиб беришди.  Биз қидираётган уйлар кўчанинг анча ичкарисида экан, сўраб сўраб топдик, жуда кўпчилик қизлар қидириб келишади шекилли, бизни хам мухлислардан деб ўйлашди. (Устимиздан хам кулишди, менимча)))

    Биринчи кирган хонадонимизда, Зохид яшайдиган уйнинг  рўпарасидаги уй эгаларига лойихамиз хақида айтганимизда, улар Уммонни яхши билишмаслиги, лекин Sayyod.com сайти хақида яхши билишлигини, кузатиб боришилигини айтишди ва сайтимиз хақида жуда илиқ фикрлар билдириб ўтишди)

   Яна бир хонадондан Уммон гурухи хақида сўраганимизда, гурухнинг  аъзоси   Жасурнинг амакиси эканликларини айтиб қолишди:

   Азиз: (Жасурнинг амакиси) : Хаммаси яхши боллар, ёмон эмас. (уйидагиларга  қараб, "Жасур аканглар хақида гапириб беринглар” дейди) 

 Жасурнинг жияни:  Хаммалари хақида гапирайликми? Яхши, зўр боллар... ухлашганида фақат)))

 Келин:  Улар хаммалиги яхши, мен келин бўлиб тушганман, ўша пайтдан бери умуман ёмон гап эшитмаганман.

   Кейинги хонадонга кирганимизда бизни бир аёл кутиб олди. Аввал ўзлари фикр билдириб сўнг "Ойижонимнинг фикрларини олинглар” деб ичкарига олиб кирдилар

 Келин: Яхши боллар. Кўча бошидан бу ерларга киргунигача қанчалик узоқлигини кўрдингларми? Хар доим йўлда келаётганимизда кўриб қолишса, мошинада олиб кириб қўйишади.  Шундан хурсанд бўламиз.

  Қумри опоқи: (Кулиб) Етти қават кўрпачани устида ўтирибман мана. Мен шу махаллага келин бўлиб тушганимга 40 йил бўлди. Шунинг учун шу махалладагиларни беш қўлимдек биламан. Биз шу махаллага маслахатгўй бўлиб қолганмиз. Шу Уммон гурухи йигитларининг тўғрисидаги қўшниси бўламан. Булар нима иш қилишса  хам, тўй хашамлар, совчиликка борса ва бошқаларида биздан маслахат олиб туришади. 

Энди Жасурга келсак, улар ўзи 5 фарзанд, Жасурим ажойиб. Ёшлигидан юмшоққина бола бўлган. Бўйнини эгиб бизларникига кириб келарди. Мени ўғлим хам Маданиятни битирган, рубоб чалар эди. Шунда Жасур чиқиб эшикни ёнида тураверарди эшитиб. Ўғлим рубобини чалиб ашула айтиб ўтирса, Жасур хам албатта шу ерда бўларди. Бир куни Ноила (Жасурнинг онаси) чиқган, "Қумри келинойи, шу ўғлимни нима қилай? Ўғлингизга қизиқяпти, қаерга ўқишга олиб боргансиз? Мен хам ўша ўқишга олиб бораман. Столларни, челакларни тақирлатиб, ашула айтиб ўтиради” деди. Чиқиб ўргансин ўғлим билан дедим. Чиқиб ўғлим билан ўт теришарди, кейин рубобда тинғир тинғир қилиб шу ховлида ўтиришарди ўйнаб. Ховузимиз бор, шу ерда чўмилиб, ухлаб хам қолишарди. Бу болларин худди ўзимни болларимдек котта қилдим хисоб. Хуллас, Жасурбек катта бўлди.

   Шохрух эса эримнинг амакиларини набираси бўлади. Шохрухни мен яхши билмасдим. Ёшлигида жуда бир хўмрайган бола бўлган. Масалан, амакимни уйику деб кириб юрмасди уйимизга. Жиддий бола эди болалигидан.

   Зохидни яхши билардим. Унинг онасининг исми Лола, Адо деган жойда раққоса бўлиб ишларди. Жа очиққина, яхши аёл. Шуни ўғли шунчалик мусиқага ишқибоз бўлиб етишибти. 15 ─ 16 ёшларида, шу атрофда жар (катта ариқни назарда тутадилар) бор, ўша ерда хамма боллар билан йиғилиб, телефон ўйнаб, гаплашиб ўтиришарди. Асосан шу уччаласини кўп кўрардим. Охири қўшиқ тайёрлаб,  телефонга чиқариб тарқатиб юборишди. Зохиднинг "слухи” жуда кучли чиқди. Секин секин радиоларга, бошқа передачаларга беришди. Шундай қилиб телевидениеларда кўрина бошлашган.

   Буларга гап йўқ. Шўх эмас, бекорга кўчада юрадиган боллардан эмас. Махалла кўйлардаги тўйларда хизматда бўлишади доим. Яқинда Жасурнинг акалари Сарвар ва Санжар уйланишди. Бир бирлигига улфат бўлиб, ёрдам бериб , бир бирига  суянчиқ бўлишади. Уларнинг ота оналарига хам гап йўқ. Оддий мехнаткаш инсонлар. Димоғи йўқ. Машхурлигини сездиришмайди. Хаммаси ахил.

   Ўғлимнинг тўйида куёвнавкаригача шу боллар бош бўлиб туришган. Видеоларда бор, хамма томоша қилишганди, Уммон гурухи йигитлари ўйнаб келишяпти деб (кулади)

  Фазилат (Қўшни): Яхши боллар. Хамма билан салом алиги бор. Ёмонлиги йўқ. Мен келин бўлиб тушганимда кичкина болалар бўлиб юришарди. Хурсандмиз шундай юлдуз қўшнимиз борлигидан.

  Равшан: (Қўшни):  Шу ерда катта бўлишган. Қийинчилик кўрган боллар, ўзининг кучи билан шу даражага эришишди. Тарбияси яхши.

   Яна бир қўшнининг уйига кириб, фикрларини сўраганимизда, аввал рози бўлгандай бўлишдию, кейин эса "Йўқ, шов шув бўлиб кетади” деб, фикрларидан қайтиб қолишди. Қизиқ, нималар хақида гапириб беришмоқчи бўлишган экан а?))))

   Ишимизни тугатиб, қайтиб кетаётганимизда, девордаги ёзувларга кўзимиз тушди. 

Sayyod.com сайтининг мазкур  "Юлдузнинг қўшниси" муаллифлик лойихаси , яна қайси юлдузнинг қўшнилари билан сухбатлашишини истардингиз? Изохларда кўрсатинг ва келаси хафта яна ноанъанавий ва четдан хамда жуда самимий хабарлардан воқиф бўласиз. 

 Нодира Махмудова ва Шахло Қодировалар тайёрлашди