Мирзо театри "Хаш-паш дегунча" дея номланган концерт дастурини 30-март кунидан бошлаб тақдим этмоқда.  Бу сўзлар мохияти хақида Мирзабек Холмедов қисқача айтиб ўтган бўлсада,  айрим аянчли ходисалар хам  фикрларидан ўрин олганлигини сезиш қийинмасди. Умуман олганда аксарият оғриқли мавзуларни қоғозга ўраб, ёки хазил орқали кўтариш қанчалик осон эштилиб кулдирсада, уни томошабинга етказиш юки шунчалик қийин ва машаққатли.  Бундай мавзуларни дастурдан сезиш учун зийрак томошабин бўлиш шарт хам эмас. 

Мирзабек Холмедов катта сахнада мана неча йилдирки буни уддасидан чиқиб келмоқда. Афсуски интернет даври сўз эркинлигидан фарқли инсониятни ичидаги салбий   (комплекслару, хаётдан хафалик, ғайирлигу, ўзини кўрсатиш каби ) хислатларни хам тўкиб сочиш учун имконият яратар экан, изохлардаги одамларнинг кўпинча айнан шу хислатларини намойиш этиб ховуридан тушишими ёки хотиржамликка эришишими...қандай номлашни хам билмайман, хуллас салбий изохлар битиб завқланишини кузатиб ажабланасан. Бундай олиб қарасанг шахсий фикр, бошқа тарафдан эса мантиқсиз... Сабаби  қайси касб сохибини  ўзи нимада айблаяпсан?-деган савол.   Бу фикрларим мазкур репортажни видеоанонсини инстаграмга қўйганимдан кейинги одамларнинг бачканадан олиб бачканага солишига қаратилган.

Қизиқчилик жиддий касбмиди ўзи? Ундан нима талаб қилинади? Юзингга табассум югуртириб ва кулиб кайфиятни кўтариб хордиқ чиқариш холос. Артистлардан ниманиям кутамиз аслида? Танқидда чуқурлашмаяпмизми? Қизиқчилик бу масхарабозликДЕК гап бўлса унга жиддий нигох билан қаралса бачканаликдан ўзга нимаям кўринарди?  Хаётда шахс сифатида бошқа бўлган одамни сахнадаги касби билан хақоротлаб қўйишдек чегарани унутмаслик керак фикримча. Унда кўча супурувчиларнию, гўнг ташувчиларниям танқид қилайлик сенлар кир иш қиляпсанлар деб. Кимдир қайсидир ишни қилиш керакку, ё хамма депутат ва ёки имом бўлсинми?  

Тўғри, хаддидан ошилган бачканалик, оилавий ўтириб томоша қилиб бўлмаслик холатлари, салбий тарғибот тарафлама бўлса бу бошқа гап. Аммо мен хозир айтаётган нарса изохлардаги шунчаки хақоротлашга қаратилган. 

Кейин хадеб мархум Хожибой Тожибоев билан таққослаш шартмикан? Ўлиб қахрамон бўлди. Ўзи қахрамон бўлиш учун ўлиш керакдек тавба... Нима қилдик яшириб, ўша даврда мен хам яшаганман ва Хожибой Тожибоев тириклигида унга қараганда Мирзабек ва Обид Асомовлар рейтингда бўлган, аммо хозир уларни айби тирик эканлигидами? 

Интернетда фақат салбий эмоцияларни чиқаришдан кўра спортзалга бориб маза қилиб мешок урган фойдалироқ бўлса керак. Ёки шу кучни ўзини ижоди устида, ёки шу вақтини бошқа мехнатга сарфлаб самарасидан завқланиш танлови хам борку. Интернетдан ижодини намоёнлаш, ижобий тарғибот учун хам фойдаланса бўлади...ёки хайрия ишлари масалан.

Шунчаки шу залда ўтирганларни биронтасини охиригача жиддий ўтирганини кўрмайсиз, ёки ярмидан чиқиб кетмагану, охиргача хохолаб кетган одам келиб изохда "ха дабдала бўлди, бачкана, ёқмади"- деса...унда нимага охиригача ўтирдинг? Нега кулдинг, умуман нега бординг?-дейсан. Жуда жиддий бўлсанг умуман тушма бундай концертларга.... 

Дастур хақида:

Дастурни 30-март  биринчи кунидан бироз суратлар ва видео тақдим этарканмиз, у видеода дастурдан 100дан атиги 30 фоизи видеорепортаж сифатида намойиш қилинади. Тўлиқ туридан  эртага , индинга, хуллас концерт кунлари ўзингиз тушиб шохиди бўлишингиз мумкин. Ёки бўлмаса тайёр лицензион диски сотувга чиққанида томоша қиларсиз, шу сабаб шу видеорепортажимизни хам кўчириб олишга қўя олмаймиз, фақат онлайн танишувга холос.  Лекин, очиғи менга ёқди!

Балки шунчаки (мантиқан тўғри настрой) маза қилиб кулиб кайфият кўтараман деган ният ва кайфиятда томоша қилганимгами. Дам олдим, кайфиятим кўтарилди, шахсан қолганига чуқурлашмадим. Оилавий томоша? Йўқ, оилавий концертларга бормайман. Бу нарса шарт ёки қизиқчиликда оилавийсига мослаш деган қатъий талаб йўқ, хар кимни ўз йўналиши. Мирзабек Холмедовни жамоаси билан сахнада неча йилдан бери кузатаётган ва билган эканмиз, демак ўзимиз нимага бораётганимизни хам билишимиз керак. Била туриб бориб кейин уларни айблаш яхшимас, зўрлаб сизни концертга олиб тушилаётгани йўқ манимча...  Хуллас ўзим учун шахсий томошамга ёқди. Бу мени шахсий таъбим, танловим ва кайфиятим. 

Дастурда импровиз сахналари кўп бўлди ва томошабинлар билан жонли мулоқот зални жонлантириб турди. 

Долзарб мавзулар хам етарли. 

Ўша аския санъати дейилмиш мажозий ўхшатмалар доирасида хазиллар хам бор. Кимга шама, кимга ўз бузуқлик назари билан қараш ва кимга эса уятдир. Бу аввал хам бўлган, бор ва бўлаверадиган стилистика. Хозир ва бугунги давр муаммоси деб қаралиши нотўғри. Эски аскияларни бир кўринг, бешбаттарини кўрасиз.  

Дастурда Мирзабек ўз стилига содиқ қолган холда бирданига юзингизга берилган табассумни шартта тортиб хам олиш онлари хам йўқ эмас.  Хориждаги бир йигитни онасига юборган хати жудаям таъсирчан. Яна ўша Холмедов режиссурасидаги қоида ва тартиб доирасида  Тохир Махкамовнинг мунгли қўшиқлари билан уланиши шу хазиллар сонияларига бироз танаффус эълон қилади.  Мирзабек Холмедов хар концертида жиддийсидан, йиғлатадиган хам ва ўйлантирадиган усулни   қўллайдиган ягона қизиқчи. Бу факт! Бу оригиналликни бошқа қизиқчиларда кўрмайсиз.  Минг танқид қилинг бачкана денг аммо бунисини тан олмай илож йўқ ва таққослаганларингиздан шуниси билан хам хозирча у юқори тура оладиган ягона қизиқчи.  

Шу кунлар  сахнада ишлаётган Шукрулло Исроиловга хаммадан хам қийин бўлса керак. Ичингда йиғлаб турсанг хам кулдириш билан бирга кулишинг керак. Санъаткорни энг оғир тарафи хам шунда... Киминг ўлса хам мотамни  ичингга ютган холда, сахнада табассум билан ишлашинг шарт. Касби тақозо этган мажбурият! Бу фонограммачи хонанда деганимаски фақат оғзини қимирлатиб турса, йўқ у ўша хазил холатига кириб томошабинни ишонтириши мухим.   

27-март куни Шукруллонинг онаси  таваллуд куни  бўлиб, у  шу куни шифохонада бўлган. Шукрулло шифохонада онасини таваллуд айёмини нишонлаб  кейин Бухорога хизматга кетади.  Шу куни 28-март кунига ўтар кечаси онаси оламдан ўтади.  Шукрулло 28-март куни тонгда 80 ёшида бу дунёни тарк этган онасини маййитини кўмиш учун олиб чиқади... икки кун ўтиб эса сахнага!

Шукрулло Исроиловга жамоамиз номидан чуқур таъзиямизни билдирамиз. Концерт кунларини яхши ўтказиб олинглар, хизматдаги бардамлик ва матонат!

Дастурни биринчи кунидан видео:

Ютубда томоша

Майтуб тасиксда томоша

ФотоВидеорепортажни Нодира Махмудова ва Шахло Қодировалар тайёрлашди.