Актриса Асал Шодиева Режиссёр Шерзод Шохалиловнинг "Дўстим руҳ” фильмида суратга тушди. Бу фильмда режиссёр бир эпизодда, тўй кўйлаги борасида, актрисадан кўнгли тўлмаганлиги ва умуман съёмка жараёни ҳақида, актриса Асал Шодиеванинг ўзи билан қисқача суҳбатлашдим.  

Феруза Фаттохова:- Биринчи марта "Дўстим руҳ” фильми, сценарийсини ўқиганингизда сизга қайси тарафлари ёқди?

Асал Шодиева:- Бу фильм дўст ҳақида бўлиб, икки дўст орасидаги муносабатлар ҳақида. Яна, фильмда севги ҳам бор. Лекин, фильмнинг асосий ғояси, дўстлик, вафодорлик. Фильм ёшларга яхши таъсир қилади деб ўйлайман, ёмон тарафлари йўқ. Бошқа фильмларга ўхшаб, фақат севги тўғрисида эмас!

Феруза Фаттохова:-  "Дўстим руҳ” фильмида актёр Дилниёз Ғаффоров билан ишлаш жараёни қандай кечди?

Асал Шодиева:- Дилниёз Ғаффоров бошқа дебютант актёрларга нисбатан, менимча кинога тайёр бўлиб келдилар. Бошқаларда ўрганиш пайти, кўникиш пайти бўлади, улар бўлсалар бошқа профессионал актёрларга ўхшаб, ҳеч ҳам ҳаяжонланмасдан бемалол ўзларини тутдилар. Мен улар билан ишлаш жараёнида, ҳеч ҳам қийналганим йўқ. Улар жуда ҳам тарбияли инсон эканлар. Чунки, ҳамма билан яхши муомалада бўлиб, вақтида келиб, ўзларини ишларига жуда ҳам масъулият билан қарар эканлар.

Феруза Фаттохова:- Фильмнинг бир саҳнасида, тўй кўйлаги кийишингиз керак экан. Шу саҳнада, эшитишим бўйича, сиз кийган тўй кўйлагингиздан режиссёрнинг кўнгли тўлмабди. Ўзингизни-чи, кўнглингиз тўлдими?

Асал Шодиева:- Бошида режиссёр менга сценарий берганида, "тўй саҳнаси бор экан” деб мен рози бўлмаган эдим. "Ҳоҳласанглар бошқача қилишимиз мумкин, ёки ҳоҳламасанглар бошқа актриса топишинглар мумкин”, деб  мен айтган эдим. Режиссёр Шерзод ака Шохалилов "Йўқ, майли биз бир йўлини қиламиз” дедилар. Кейинчалик келишиб, бир қарорга келдик, мен келин кўйлак кийгим келмади, чунки бир ролимдан кейин бундай саҳналарда ўзи чиқмайман.   

Фильмда келин кўйлаги киядиган жойларини ёмон кўраман. Мени съёмкага кийиб келган кўйлагим, жуда ҳам оддий эди. Нима десам экан, менинг бувим, ўзларининг тўйларида шундай кўйлак кийганлар. Мисол учун, бизларни ота- бувиларимиз, жуда ҳам "скромный” куйлаклар кийишган. Мени кўйлагим ҳам худди шунақа, жудаям "скромный” эди. Барибир, шу саҳна фильмда бўлиши керак экан, шунга бир илож қилдик. Тўғри, у кўйлакни кийганим, режиссёр Шерзод акага ёқмади. Бу борада озгина келишмовчилик бўлди, лекин биз уришганимиз йўқ, жанжаллар бўлмади. Шунчаки, менга ноқулай тарафи, уларга ҳам ноқулай бўлиб қолди. Бу саҳнадан, мени ҳам кўнглим тўлмади, барибирга ҳам бу саҳнани ўйнагим келмади. Режиссёр Шерзод акани ҳам, бу саҳнадан кўнгиллари тўлмади. Бу саҳна фильм учун керак, шарт экан. Шунинг учун, ноилож бир йўлини топиб, суратга олинди. Лекин, у ерда тўлиқ кўйлак кўрсатилмаган. Соч причёскаларим, келинларникига ўхшаб қилинган (кулади)

Феруза Фаттохова:- "Дўстим руҳ” фильми съёмка жараёнида, бундан ташқари ҳам режиссёр Шерзод Шохалилов билан тортишувлар бўлдими? Умуман ишлаш жараёни қандай кечди?

Асал Шодиева:- Йўқ, бошқа бундай ҳолатлар бўлмади. Режиссёр Шерзод ака ҳаётда ҳам яхши инсонлар ва бундан олдин ҳам "Жигарбандим” фильмида, улар билан бирга ишлаганмиз. Улар у ерда оператор бўлганлар. Сўнг, улар мени ўзларини картиналарига таклиф қилдилар. Уларнинг бу иккинчи ишлари, менимча бошқа режиссёрларга нисбатан ҳаммасини тушунтириб бериш, бу уларнинг қўлларидан келди. Улар нафақат мен билан ишладилар, балки актёрлар Мурод Ражабов, Алишер Узоқов, Адиз Ражабов, Дилниёз Ғаффоровлар билан ҳам яхши  ишладилар.

Феруза Фаттохова:- Фильмдаги ролингизда, каскадёрдан ҳам фойдаланилган экан?

Асал Шодиева:- Фильмда бир-иккита қийин саҳналари ҳам бор эди, у ерда каскадёрсиз иложи йўқ эди. Чунки, у ерда бир эпизодда, каскадёрни устига, қурилиш бўлаётган жойдан, ғишт тушиб кетиши керак эди. Ундай жойларни, менимча ҳеч қайси актриса қилиб бера олмаса керак. Бир нарсани айтиб ўтишим мумкин, у каскадёр менга жуда ҳам ўхшаган, эсимда бор. Ҳатто, бир хил кийимда тушган расмимиз ҳам бор эди (кулади).

Феруза Фаттохова:- Актёр Алишер Узоқов билан сизларни, яна бир партнёрлигингиз қандай кечди? Улар билан ишлашнинг қайси тарафлари сизга ёқади ва аксинча ёқмайди?

Асал Шодиева:- Алишер ака билан ишлаш жуда ҳам осон ва ҳамиша бошидан менга ёрдам бериб келганлар, шу пайтгача менга тўғри маслаҳатлар берадилар. Шу ҳамма фильмларда ишлаганимиз каби, яхши ишладик. Бу гал Алишер ака озгина чарчабдилар, менимча. Негаки, ўтган йили жуда ҳам кўп ишлаганлар. Лекин, шунга қарамасдан ролни яхши ўйнашга ҳаракат қилдилар. Менимча, ўз ролларини яхши уддаладилар. Менга Алишер ака билан роль ижро қилишни битта қийин тарафи бор, уларга қарасам кулиб юбораман (кулади). Нимагадир ўйнай олмайман, уларга қарасам кулгим келади. Нафақат мен, Дилниёз акада ҳам шунақа. (кулади) Шу нарса ишлашга халақит беради. Алишер ака кулдираверадилар, кейин бизларга режиссёр "Эй кулманглар, ўйнанглар”, деб бақирадилар. Алишер ака бўлса, ҳар хил нарсаларни гапириб, ҳаммамизни кулдирадилар. (кулади)

Феруза Фаттохова:- Ўзингиз бу ролингизни, бошқа ролларингиздан қандай фарқи бор деб ўйлайсиз?

Асал Шодиева:- Ҳар бир образни ички ҳаёти бўлади. Мен ҳамма киноларимда шўх ёки қувноқ қизларни ўйнаган бўлсам, ўзи энди мен кўпроқ комедияларда ўйнайман-ку. Бу кинода жуда ҳам, оғир-босиқ қизнинг ролини менга беришди. Ортиқча кулмайди, ортиқча гапирмайди.

Феруза Фаттохова:- "Дўстим руҳ” фильмидаги ролингиздан томошабинлар, ўзларига нима олишлари мумкин?

Асал Шодиева:- Мени қувонтирган жойи, мени образим мени тенгдошларим учун салбий таъсир қилмайди. Образим қизларга тарбия тарафидан ҳам ёмон таъсир қилмайди. Мени ролимдан улар олса, фақат яхши нарса олишлари мумкин, лекин ёмон нарса олишмайди. Мен ўйнаган ролларимдан, мени тенгдошларим ёмон нарса олишмаса, мен бундан жуда хурсандман.

Феруза Фаттохова:- Ўзингизга қандай ролларни ижро этиш, руҳиятингизга яқин?

Асал Шодиева:- Ҳозирги вақтда мен ҳар хил ролларни ўйнаб кўргим келяпти. Мен битта қолипда, мисол драматик актриса ёки комедик актриса бўлиб қолгим келмаяпти. Шунинг учун, секин-секин ўзимни ҳар хил ролларда синаб кўраяпман. Шу сабабли, ҳали ўзим учун билмадим, менга қандай роллар яхши? Менимча, биз актрисалар учун, ҳар бир ролни ўзига яраша юки бор. Ҳаммасини ижро этиш, ўзига яраша қизиқарли.

Актриса Асал Шодиеванинг бу образи бошқа ролларидан қандай фарқ қилиши ва қандай чиққанлигини, албатта "Дўстим руҳ” фильми, экранларга чиққач, фильмни кўриб, билиб олишимиз мумкин.

Феруза Фаттохова