Қадимдан "Қозонга яқин юрсанг, қораси юқар” деган нақл мавжуд. Албатта сизу биздек оддий инсонлар қолдирган бу сўзни давомлаш хам, ўз фикримиз ва онгимизнинг имкониятларига боғлиқ бўлса керак.

 "Бўш қозонга яқин юрсанг қораси юқар,  таом тўла қозон сенга емиш берар” деган кўринишни тақдим этгим келди.

Инсоният умри давомида то ўла ўлгунича шаклланиб бораверади. Унинг нафақат турмуш тарзи, балки ўша омади, юриш-туриши, хаёт мазмуни хам тубида атроф мухитнинг таъсири ётади.

Йўқ, мен иродалиман, вой ман қандоманки сўзларни четга суринг. Бу айни хақиқат, ишонаверинг, дунёга яланғоч келган гўдакнинг,  ота онасидан ДНК, қандайдир наслий касалликлар, маълум характер, кўринишу тузилишларидан ташқари, қолгани хам шу тарзда яланғоч бўлади.  Барчасини умри давомида атроф мухитдан олган тарбия, кўрган кечиргани, дарсликлари, хис этганлари ва хоказолар билан шаклланиб бораверади.

Дарсликлар,  таълимлар,  тарбия, булар албатта мухим роль бўлгани билан, унга қараганда барибир  тажрибанинг роли катта бўлади.  Бошинг урилгани, кўрган билганинг,  ўзинг хис этганинг албатта бошқа. Атроф мухит... хар қанча иродангиз зўр бўлмасин, барибир кўп вақтни ўтказадиган жамоангизни таъсири катта бўлади.

Бугунги кунда атрофимизда кимлар? Улардан нима оляпмиз? У қозонни қораси юқяптими ё таоми? У инсонлар маънан кимлар? Фикри хаёллари ўрнакми?

Менимча мана шундай маъжозий нигохни атрофимизга онда-сонда бўлса хам ташлаб турсак, хаётимизга ижобий таъсири кўпроқ бўлса керак. Мен хозир манфаат тўғрисида фикр юритаётганим йўқ, пул, бойлик булар хаммаси ўткинчи. Инсоннинг фазилатлари, маънавий бойликлари, билим ва хулқи, ўша йиллар давомида йиққан жихатларидан энг кўпи қандай эканлиги билан саралаб олиш қийин эмас. Эҳтимол бу  ҳам манффатга кирар..Майли, ўткинчи нарсага кўз олайтиргандан кўра, керакли, мухим ва беминнат бойликка нима етсин?

Хар бир бўш қозонни жаранглаганига тобе бўлиб бораверсак, унинг қорасини юқтирамиз. Тўла қозон эса,  майли овоз чиқармасин, лекин унда шунчаки овоз эмас, таоми бўлади.

 Атрофимизни файзли инсонлар ўраб турар экан, хонадонимиздаги қозонлар хам бўш бўлмайди.

 Саййид-ул айём муборак ахли мусулмонлар! 

Sayyod