Жума намозида бир танишим билан кўришиб қолдим. Шу пайт биз ўтирган жойни ёнидан унинг жияни дўстлари билан ўтиб қолди.

Қизиғи танишимга салом хам бермади,  танишим эса истехзоли кулиб қўйди.

-Тинчликми?

-Мен билан ярим йилдан бери гаплашмайди.

-Хеч бўлмаса салом берса бўлардику нари борса 16-17 ёшда бўлса..

-Ўзини онаси билан бир ойдан бери гаплашмаяптику...

-Унда нима қиляпти жума намозда?

Ғалати савол бердим а? Тўғри ғалати савол...балки ахмоқона. Лекин ўз онаси билан бир ойдан бери гаплашмаётган ва тоғасига жума намозида алик бермай ўтган одамни шу масжидга келишини ўзи шахман мен учун ғалати ва мантиққа зид..

Нима учун масжидга келди тушунмадим.

Фарз? Мажбуриятми?

Саломчи? Фарзмасми? Онаси билан гаплашмаслик хамми?

Ундан кўра онангни рози қилиш учун вақт кетказиб шу Жума намозига чиқа олмасанг мантиққа тўғрироқ келармикан?

Келинглар бир тахлил қилиб кўрсак, жума намозига ўзи нима учун борасизлар? Нахотки бу хам бора бора "понт” турига кирмоқда? Гунохларни ювганими?

Тавба тасаввур қила олмаяпман Худодан масжидда гунохларини ювишини сўраб туриб гунох қиляпти. Тоғасига салом бермай онаси билан гаплашмай туриб...йўқ тушуна олмаяпман барибир. Мантиқ онгим билан шок терапиясида дам олмоқда.

Мана шу савол кўп қийнайди, нима учун ўзи масжидга келишаркин? Масжид гунохлардан суғурта офисими?

Намоздан чиққан бир амақи мошинасига ўтирдию, ёнидан мошина чиқдимией, нимадир бўлиб бошқа хайдовчини бўралаб сўкиб кетди. Яъни Лут қавми шуғулланган иш билан ўша хайдовчи билан оғзаки шуғулланиб қўйди.

 У хайдовчи эшитмас масофага етганида эса унинг онаси  билан  шахвоний фантазиясида беникох зино хам қилиб бўлди.

Хооозиргина жума намозидан чиқдилар дейилади бу ўртоқлар...

Бугун Жума! Муборак кун! Жумага отланаётганда у ерга хаммомга отлангандек гунох ювиш маросимига эмас, ўшаларни бартараф этишдан бошласак мантиқан тўғри бўлармикан?

Сендан кимнидир дили оғриб турганида Аллохга мурожаатингдан не фойда? Аввал ЎЗИНГни қўлингдан келадиган нарсаларни қил кейин эса Аллохга мурожаат қилсангчи.

Жума намози фарз, лекин Аллох инсониятга онгни бекорга бермаган, ва ўша икки йўл берилиши хақида фикрласак, дейлик сизда икки йўл бор: жума намозга бориб Аллохдан гунохни ювишни сўраш ёки жума намозга келишдан аввал бориб ўша гунохларни бартараф этиб, яқин инсонни дилини оғриқдан халос қилиб кўнглини кўтариш.

 Хулоса ва жавоб сизлардан, зеро Жума намоз борку деб йўл-йўлакай истаган гунохларни қилиб бораверсак унда намозга не хожат?  Барибир Худо кечиримли, жума намозга бориб турсам бўлгани деб истаган нарсани қилаверсак...ғалатимасми..

Ундан кўра умуман масжидга бормай, шу хўжа кўрсинликни бажармай, лекин хаётида ХАРАКАТИ билан яхшилик қилгувчи, ёмонлигини Худодан кечир деб эмас, харакатда бартараф қиладиган одам балки Аллохга яқинроқдир?

Дўзахга тушасан нималар деяпсан...

Ээээ сан қаттан биласан? Бир банда бўлсанг.

Худо билади сен эмас. Банда айтгани бўлмайди. Аллох учун сен қоида туза олмайсан хам башорат хам қила олмайсан. Хамма ўзи учун жавоб беради. Айнан мана шундай бонг уриб гапирадиганларни харакатига қарасанг...эх..

Яхшилик ва ёмонлик ўз номи ва тушунчаси билан яхшилик ва ёмонлик!   

Ўзимиз ёзиб, ўзимиз ишониб бошқаларга хам сингдирадиганимиз эмас! Нима бўлса хам одам аввало ОНГига қараб иш тутса бўлди, мана шу  билан хайвондан ажратганку бизни.

Биласизми хаётда икки нарсани бахсида поёни йўқ: дин ва сиёсат.

Шартми бахслашиш?

Иккиси хам қонун ва бир бирига ўхшаш. Ёзилганини қил бўлди, шартми чуқурлашиш?

Оддий онгли нарса, иккисида хам ўғирлик қилма, жарохат етказма, номусга тегма ва шунга ўхшаш яхшиликни химоя қилгувчи ёмонлик учун жазолаш хақидаги қонун ва қоида.

Яхшилик ва ёмонлик ўз номи ва тушунчаси билан яхшилик ва ёмонлик!  Фарз ва мажбурият дегани эса бу энди шу нарсалар мохиятидаги иккиламчи нарсалар бўлса керак.

Ишхонангизда бирор бир ходимни уриб тепиб уни ўзидан узр сўрамай, бошлиқ олдига кириб узр сўраганингизда қани мантиқ? Яна бошлиқ олдидан чиқиб, у ходимни олдига қайта келиб яна бир икки уриб тепиб, ха бошлиқни олдига кириб узр сўрайман-деганда қани мантиқ?

Мана шу тушунчалар хақида эди бугунги фикрларим. Чайнаб бўлинди, ютиш қолди.

Шахсий фикр. Шунинг учун унинг учун жавобгарлик хам, унинг гунохи хам ўзимнинг зиммамда.

Саййид-ул айём муборак!

(Нега жума овози рукни кам ёзасиз дейдиганлар учун бирда жавоб: узр ман сўфи,  имом ёки дин пешвоси эмасман, ўзим хис қилган мавзуни ёрита оламан, буюртмани эмас. Бу энди хаётимдаги воқеа ва учрайдиган ходисалар, таъсирланганларим ва озгина ижодий илхомга боғлиқ. Булар устидан назорат қилиб буйруқ берилмайди. Хар қанча ўзимни уриб тепиб мажбурласам хам уддасидан чиқа олмайман! )