Бир хонандани клипини суратга олиш пайти эшак-арава керак бўлиб қолди. Сағбондаги  лўлилар махалласига эшак-аравани ижарага олиш учун келган ижодий гурух ичида биз хам бор эдик. 

Суратга олиш ишлари учунлигини билган махалладаги ёши улуғ киши ва аёллар тўпланиб ўз эътирозларини айта кетишди:

-Анави Саид деган режиссерларинг бор экан, ўша фильмида лўли қизни иштонсиз ва бош яланг қилиб кўрсатиб бизни хамиятимизга теккани етмаганидек, яна лўлилар ўлса ўз уйида кўмиларкан деган тушунчани фильмда кўрсатибди. Бу нима деган гап? Қаердан олинган бу нарсалар? Ана, қаранг махалламиздаги қизларни, биронтасини иштонсиз  кўряпсизми? (рости хам шу ерни ўзидаёқ турган 10-15 қизларни хаммасини кўйлаги тагидан иштони кўриниб турарди-муаллиф)

Бизни мозорларда хилхоналаримиз бор, ким уйига кўмаркан? Нима учун фильм ва клипларда  лўлиларни хамиша ер қилиб кўрсатишга харакат қилишади?

Гадойчилик   бизни урфимиз хам эмас анъанамиз хам эмас! Бошқа миллатда йўқми? Рус ёки ўзбекларда гадой йўқми? Фақат лўлиларни гадой санаш нотўғри. 

Азалдан бери менга хам маълум бўлган лўлилар хақидаги қизиқ хабарлар борасида жим тура олмадим ва йиғилган лўлиларнинг ғазабига қарамай савол бера бошладим:

Сизларда эркак уйда ўтириши ва аёли ишлаши урф экан, буни никох пайти хам келин "эримни бир умр боқаман" деб  қасам ичиб айтаркан, шу ростми?

Ёши катта киши:-Тавба, қаердан чиққан гап бу? Мана хозиргина ишдан келиб энди овқатланаётгандим, съемка келибди деганига чиқдим. Яна бизларни мазах қилиб нимадир олмаларинг деб. Қанчадан қанча лўлилар олий маълумотли, худди ўзбеклардек  оддий халқмизку. 

Ёш бир лўли йигит (жахл билан сўкинади):-Қанақадир бир ****(бииип)**лар машнақа гапларни тарқатадида бутун хамма лўлиларни қора қилиб кўрсатади.

Аёлларингиз хам эркаклардан олдинда юрармиш...

Лўли киши:-Бўлмаган гап эй! Эркак олдинда, кетидан аёл! Бизда хам эркакни гапи юқори!

Яна бир савол борасида қизиқишим устун келиб  чидай олмадим:

Махалламиздан авваллари "шарабара" ўтарди...

Лўли йигит:-Ха, пистон, хуштак коптокларми? (кулади) хозир бундай нарсалар йўқ бўлиб кетган. Шунчаки "хунарчи"лар дейиларди.  

Деярли хар хонадон олдида эшак-арава кўряпмиз...

Лўли киши:-Ха энди бу "ота-касб". Ўша бутилка йиғиб сотиб кун  кечириш. 

 Видеокамерага сухбатни олмоқчи бўлганимизда улар рад жавобини беришди. Бу режалаштирилмаган сухбат бўлгани учун кетиш пайтигача улгурилган савол-жавоблар  эди... Афсуски тиллачилару фолбинлар хақида саволларим қолиб кетди.  

Шу куни клипи суратга олинаётган аёл хонандани  хазиломуз ролини лўлилар қай тарзда қабул қилишаркин билмадиму, аммо бу учрашувгача сценарий ёзиб бўлинган ва суратга олиш ишлари кетаётганди. Бироқ,  бу сухбатдан кейин лўли аёл ролидаги хонанданинг хар икки образига хам ўша захотиёқ рўмол ўраттириб, иштон кийгиздиришга муваффақ бўлдим.

Хеч бўлмаса шу тарафлама лўлиларга ёқар деган умиддамиз)