Болалигимиздан Хайит байрами  янги "хай хайла” кийишу ва ширинликлар билан боғлиқ бўлган. У пайтлар "Хўрозқанд” деган ўзбекона "чупа-чупс”лар бўларди. Хўроз ва бошқа хайвонлар шаклида, байрамларда катта катта қизил юлдузчалик ва хоказо.

Модернизация бўлиб ширинликлар хам ривожланиб кетган. Лекин айнан   хайит кунлари уларни яна учратиш мумкин. Албатта шу куни тонгдан масжиддан қайтар чоғи уйга иссиқ патир нонлар олиб кириш хам урфга айланган.

Бугун хайр Рамазон дейману, яна уни соғинаман. Мана шу 30 кунда ўзимни қанчалар тарбияланганимни хис қилиб, хайит куни  ўзимни ички матонатимдан ғурурланаман.

Рўзани фойдаси хақида кўп гапирамиз, лекин нималарни хис қиламиз? Чуқурроқ тахлил қилсакчи? Фақат кимгадир қоринни кетказиш ёки гунохни ювиш учун эмас, аслида рухиятни тозалаб, ўзликни англаб, ўзимизни тарбиялайдиган ой эмасмикан?

Уйқуни ширин пайтида уйғониш, ўзингиз билан курашасиз, рухан мажбуриятни тарбиялайсиз. 5 махал намозда гунохларимдан кечишингни сўрайман дея илтижо қилганда унинг мохияти онгимизга сингиб бораверади.

30 кунлик сабр, матонат ирода чархланиши фақатгина ошқозон нафсида эмас аслида. Ўша жинсий нафсда хам эмас аслида. Вахоланки мана шу иккиси бу дунёдаги инсонни аксарият хатоларга йўналтирадигани, аксарият гунохлар негизи бўлади. Бу дунёдаги ишқ қўйган ёлғон нарсаларимиз омили хам шу икки нафс.

Мана шуни йилига 30 кунда тарбиялар эканмиз, мунтазам рўза тутиб борадиган инсон бу гапларимни тушуниши осон, дунёқараш ўзгача бўлади. Қалб хам тозаланиб кўп нарсага кўз юма олишга, кези келса энг кучли ғурурни хам эга олишга ундайди.

Рамазон ойи аслида рухият тарбияси  учун бир сессия деса хам бўлади.

Яна дунёнинг қанчадан қанча очлар...йўғэ, оддийгина керак бўлса бир эшик нарида яшаётган мусофирми, қийналиб қолган қўшнимизми, сал нарида хеч бўлмаса нонга мухтож ижарадаги талабами шуларни нафақат хис этамиз балки имконият бўлса уларга ёрдам беришга кўзимиз "очилади”.

Қийналган одам фақатгина тушунади буни.  Қорни очни қорни тўқ тушунмайди деб бекорга айтишмайди. Лекин мусофирчиликни кўрган, керак бўлса бир бурда нонга зор бўлган одамгина тушунади. Рўза тутган одам эса мана шу тушунчани хис эта олади!

Худони ўзи кўрсатмасину шундай бўлиб бир бошқа мамалакатда мусофир бўлибми, ё шунчаки тақдир тақозоси билан бир кун уйда бўлиб қолиб бир бурда нонга пулингиз йўқ бўлди дейлик. Эшик тақиллаб қўшнингиз бир коса иссиқ овқат билан холингиздан хабар олиб кириб келса борми. Хизр кўргандек қувонасиз, дунёдаги энг мехрибон одам шу бўлади сизга.

Хуллас бугун Рамазонда тўлиқ 30 кун рўзани тутган инсонлар аввало ич ичидан ўзларини хурмат қилиш хисси кучайганини биламан.  Юқорида ғурурланаман деганим хам бежиз эмас, негаки инсон авало ич-ичидан ўзига бўлган муносабатни шакллантира олмас экан, атроф мухитга хам шундай бесаранжом муносабатда бўлади.  Шунинг учун хамиша кўнгил синса тана ёрдам бера олмайди, аввало кўнгил кучли бўлсин дейман. Инсон рухияти қанчалик кучли бўлса керак бўлса нотавон танани хам кўтара олади.

Келаси Рамазон ойигача ижобий хислатларимни, иродамни метин ушлаб туришга харакат қилар эканман, хайр Рамазон дея уни яна соғиниб қоламан!

Барча мусулмон ахлига Хайит муборак!

Хаётимизда янги "хай хай”лар кўп бўлсин)))