Азиз Раметовни топиб, ўзидан "Тинчликми Азиз?" деб сўрашга улгурмасимиздан ўзи қўнғироқ қилиб сўрайди:

-Ока тинчликми?)))

Сайтимизга қўйган анонсимиз бир зумда унга етиб боргани аниқ.

Бир бошдан!

Куни кеча тв оламидан бир сахих манбаамиз (афсуски бу сафар сал қоқилди)  Азиз Раметовни нақ 7 йилга озодликдан махрум қилиб юборди. Яна камига гиёхванд модда билан)))

Албатта дарров бу нарсага ишонмай текшириш керакку. Келиб келиб бир хуқуқ тартибот органидаги таниш ва ишончли манбаамизга мурожаат қилсак, ха эшитгандекман деб қолса денг.

Азиз Раметов: -Хамма хавотирда , хавотир олиб хол-ахвол сўраган. Хурсанд бўлиб кетдим  керак инсон  эканман. "Ўтов" фильмидан сўнг менга гиёхванд тамғаси қўйиб олишган, бу хақида кўп гап бўлган, демак ролим ишончли чиққан. Яқиндагина яна гап тарқалишига эса асос бор. 

 Гап шундаки, бир фильмни суратга олиш жараёнида ўша фильм образидаги мохиятига хос кўринишда бўлгандик.  Хозирча фильм номи ва аниқ тафсилотни айта олмайман, озгина қолди катта экранга чиққач кўриб хаммасини билиб тушуниб оласизлар.  Суратга олиш майдончасидан ташқарида милиция ходимлари билан айнан шу фильмдаги кўринишимиз туфайли муаммога учраганимиз рост! Аммо бу гиёхванд модда билан боғлиқ эмас албатта, хеч ким судланмади, эшитиб турганингиздек хаммаси жойида шунчаки айни дамда Самарқандда бувимникидаман. У воқеадан тегишли хулоса қилганимизни хам айта оламан. Рахмат уларгаям.

Ижодий янгилигимга келсак, Ўзбекистонда суратга олинган юқорида айтилган ўзбек киносидан ташқари Россия киноижодкорлари билан хам ишладим. Кэри Тагава , Игорь Жижикин , Петр Мамонов, Петр Федоров, Любовь Толкалина  ва Иван Охлобыстинлар билан "Иерей Сан" фильмида Чингизхан образини яратиб келдим. 3 ой суратга олиш ишлари Россиянинг Ростовида бўлиб ўтди. Яқин кунлар фильм премьераси бўлиб ўтади.