Ona diyorimiz uzra bahor nafasi keza boshlagan mana shu yorug` kunlarda siz, azizlarni, butun O`zbekiston xotin-qizlarini 8 mart - mehr-muhabbat va nafosat bayrami bilan samimiy qutlab, barchangizga o`zimning yuksak hurmat-ehtiromim va ezgu tilaklarimni izhor etishdan baxtiyorman. Biz betakror yurtimiz, go`zal o`lkamiz, barchani o`ziga maftun etadigan husunkor tabiatimizni ayollarimizga xos bo`lgan qalb saxovati, hayo va iffat, vafo va sadoqat tuyg`usi , sabr-bardosh va mehr-muruvvat fazilatlari bilan uzviy bog`liq holda, bularni Ollohning o`zi bizga bergan tengsiz va xosiyatli ne`matlar deb tasavvur qilishimiz tabiiydir, desam ayni haqiqatni aytgan bo`laman
Chindan ham, Yaratganning buyuk va beqiyos mo``jizasi bo`lmish ayol zotini ta`riflash va madh etish uchun har qanday yorqin timsol va tashbehlar kamlik qiladi.
Ayol deganda, ko`z oldimizda avvalambor aziz va mukarram Ona siymosi namoyon bo`ladi. Barchamizni yuragi ostida o`stirib dunyoga keltirgan, oq yuvib, oq tarab voyaga etkazgan, o`zining oq suti, mehr-muhabbati bilan qalblarimizga olijanob insoniy tuyg`ularni singdirgan munis onalarimizga har qancha ta`zim qilsak, ularni har qancha ulug`lasak, arziydi, albatta.
Barchangizni go`zal ayyomingiz bilan yana bir bor chin qalbimdan muborakbod etaman.
Toleingiz baland, rizqi nasibangiz ziyoda, go`zallik va mehr-muhabbat doim sizga yor bo`lsin
Xonadonlaringizdan fayzu baraka arimasin!
01.03.2011 T.A.Azimov
